समाचारहरू

शैक्षिक सत्र आधा सकिँदै लाग्दासमेत सिगास गाउँपालिका–८ पारिवन आधारभूत विद्यालयमा अध्ययनरत छात्रछात्राहरूले किताब पाउन सकेका छैनन् ।

सिगास गाउँपालिका–८ पारिवन आधारभूत विद्यालयका लागि किताब किन्ने बजेट आएको भए पनि विद्यालय प्रशासन र व्यवस्थापन समितिले वास्ता नगरेको विद्यार्थी तथा अभिभावकको अरोप छ ।

विद्यार्थीको हातमा किताब नहुँदा शिक्षकले एउटा किताबको भरमा कक्षा सञ्चालन गर्दा विद्यार्थीको पढाइमा असर पुगेको स्थानीय अविभावक पवित्रा साउदले बताउनु भयो ।

विद्यार्थीले किताब नपाएको विषयमा जिज्ञासा राख्दा विद्यालय व्यवस्थापन समितिका अध्यक्ष दिपकसिंह ऐरले विद्यालयमा सबै पाठ्यपुस्तक पुगेको दावी गर्नु भयो ।

उहाँले भन्नु भयो–‘कसले भन्यो विद्यालयमा किताब पुगेको छैन भनेर ? सबै किताब पुगेका छन् । कुनै समस्या छैन । पछिल्लो समय मेरो कार्यकाल पनि सकिनै लागेकोले म अन्य योजनामा व्यस्त छु ।’

विद्यालयका प्रधानाध्याक रमेशबहादुर ऐरले भने किताब नभएको स्वीकार गरेका छन् । प्रधानाध्यापक ऐरले भने– ‘बजेट त पहिले नै निकासा भइसकेको हो । किताब विक्रि गर्नेलाई हामीले बजेट पनि दिइसकेका हौँ । अन्य विषय आए पनि कक्षा ४ को नेपाली र गणितको किताब पुगेको छैन ।’

विद्यालयमा आफु मात्र स्थायी शिक्षक भएकोले अन्य सबै निजी श्रोतमा शिक्षक राखेर पढाउनु पर्ने बाध्यता समेत रहेको प्रधानाध्यापक ऐरले बताउनु भयो ।

स्थानीय तहमा वडा कार्यालयले आधारभूत विद्यालयको व्यवस्थापन गर्नु पर्ने प्रावधान भए पनि प्रधानाध्यपक र विद्यालय व्यवस्थापन समितिका अध्यक्ष रहेका दुइ छोराहरूका बुवा वडा कार्यालयको सचिव पदमा छन् ।

विद्यार्थीले किताब नपाएको  विषयमा जिज्ञासा राख्दा वडा सचिव मोहनसिंह ऐरले आफु धनगढी अस्पताल आएकोले कुनै जानकारी नभएको बताउनु भयो  ।

उहाँले भन्नु भयो– ‘छोराहरू विद्यालयको जिम्मेवारीमा छन् । विद्यालयमा के भइरहेको छ भन्ने कुरा मलाई खासै थाहा छैन । म बच्चाको पत्थरीको उपचार गर्न धनगढी आएको छु ।’

विद्यालयमा गणित र नेपाली विषयको किताब नपुगेको विषयमा सिगास गाउँपालिकाका प्रमुख प्रशासकीय अधिकृत रघुनाथ अवस्थीले विद्यालयलाई १५ दिनभित्र पुस्तक किन्न भनेको बताउनु भयो ।

उहाँले भन्नु भयो–‘मैले विद्यालय व्यवस्थापन समिति र प्रधानाध्यापकलाई भनिसकेको छु । छिट्टै कितावको समस्या समाधान गर्नुस् ।’ यसबारेमा आफूलाई पहिला थाहा नभएको पनि उहाँले बताउनुभयो ।

कक्षा पाँचसम्म पढाई हुने पारिवन आधारभुत विद्यालयमा १ सय २२ जना विद्यार्थी अध्ययनरत छन् ।

नरी बडु