शुद्ध पिउने पानीबाट स्थानीयहरू वञ्चित

  ०७६ असोज १५ गते

संविधानको धारा ३५ मा स्वास्थ्यसम्बन्धी हक अन्तर्गत प्रत्येक नागरिकलाई शुद्ध खानेपानी तथा सरसफाईको हक हुनेछ भनी स्पष्ट व्यवस्था गरिएको भएता पनि आदर्श गाउँपालिका–४ हिन्नेकाँडाका करिब २ सय घरपरिवार नाउला वा इनारको दुषित पानी पिउन बाध्य भएका छन् ।

विगत १० वर्षदेखि पिउने पानीको चरम अभाव भएको भए पनि सम्बन्धित निकायले ध्यान दिन नसकेको स्थानीयहरूको आरोप छ ।

प्रत्येक वर्षको फागुनदेखि असारसम्म पिउने पानीको अभाव रहँदै आएको भए पन यस वर्ष साउनमा वर्षाको कारणले मुहानमा ढुङ्गामाटो पसेपछि गैरागाउँस्थित दलितबस्ती र हिन्नेकाँडाका करिब २ सय घरधुरीले पिउने पानीबाट वञ्चित हुनु परेको स्थानीय ३३ वर्षीय विश्वनाथ ओझाले दुखेसो पोखे ।

गाउँ नजिकै रहेको मथिना कुवामा पर्याप्त मात्रामा पानी नभएका कारण बिहान ४ बजेदेखि नै लाइनमा बस्नु परेको र कुनै दिन ५ लिटर पानी पाउन मुस्किल भएको स्थानीय २० वर्षीया सिता भट्टले गुनासो गरिन् ।

स्थानीय ३५ वर्षीया निर्मला ओझाले आफूहरूले बिहान ४ बजेदेखि नै पानीका लागि घरबाट निस्कनु पर्ने र लुगाधुनका लागि दुई घण्टाको दुरीमा रहेको ठुला खोला र बुडलीगाड पुग्नु परेको बताइन् ।

उनले भनिन्–‘रातिको समयमा आवतजावत गर्न डर लाग्छ । बाघ भालुको आक्रमण हुने खतरा छ । तर, पानीका लागि ज्यान खतरामा राख्नु पर्ने अवस्था छ ।’

विगतका वर्षमा कुवामा पर्याप्त मात्रामा पानी आउने गरेको भए पनि हाल पानीमा मुहान सुक्दै गएका कारण समस्या झेल्नु परेको स्थानीय ६० वर्षीय शङ्कर बिकले दुखेसो पोखे ।

जुकाने भन्ने ठाउँमा रहेको हिन्नेकाँडाको खानेपानीको मुहानमा वर्षको सात महिना मात्रै थोरै पानी आउने गरेको भएपनि हाल उक्त पाइपलाइनमा पानी आउन बन्द भएपछि समस्या झेल्नु परेको स्थानीय रवि भट्टले बताए ।

उनले गाउँपालिकासँग पटकपटक समस्या समाधानका लागि अनुरोध गर्दासमेत गाउँपालिकाले आश्वासन मात्रै दिँदै आएको आरोप लगाए ।

गाउँपालिकाका उपाध्यक्ष निर्मला ओझाले गत वर्ष जुकानेदेखि हिन्नेकाँडासम्मको खानेपानी योजना मर्मत गर्न पहल गरिएको र आगामी दिनमा राम्रो मुहान खोजेर स्थानीयलाई खानेपानी पुर्‍यायउने बताइन् ।


बासुदेव जोशी