शिक्षक हत्या घटनाका आरोपित गिरफ्तार

  ०७७ कात्तिक २ गते

माइ नगरपालिका–१ स्थित अम्लिसे भञ्ज्याङ्ग आधारभूत विद्यालयका ४६ वर्षीय शिक्षक पुष्पलाल राईको असोज २९ गते हत्या गरेको आरोपमा प्रहरीले माइ नगरपालिका–१ का ४५ वर्षीय पदमबहादुर राईलाई प्रहरीले कात्तिक २ गते गिरफ्तार गरेको छ ।

शिक्षक राई असोज २९ गते बिहान स्थानीय पदमबहादुरको घरको आँगनमा घाँटी रेटेको अवस्थामा मृत फेला परेका थिए ।

राईको घाँटीको पछाडि पट्टिको भागमा धारिलो हतियार प्रयोग गरिएको पाइएको स्थानीय अधिकारकर्मी विमलकुमार दाहालले इन्सेक प्रतिनिधिसँगको फोन सम्पर्कमा बताउनु भयो ।

घटनाको अनुसन्धान गर्न सङ्घीय प्रहरी इकाइ धरानबाट ल्याइएको कुकुरले ट्याकिङ गरेपछि आरोपित पदमबहादुरलाई अनुसन्धानका लागि गिरफ्तार गरेको जिल्ला प्रहरी कार्यालयको एसपी नविनराज राईले बताउनु भयो ।

शवको पोष्टमार्टम वीपी कोइराला स्वास्थ्य विज्ञान प्रतिष्ठान(घोपा) धरानमा कात्तिक १ गते गरी शव परिवारलाई बुझाएको एसपी नविन राईले बताउनु भयो ।


कोकिला ढकाल