समाचारहरू

महाकाली नगरपालिका–४ निवासी महेन्द्र नमूना माध्यमिक विद्यालयमा कार्यरत शिक्षक २८ वर्षीय दिनेश मल्ललाई प्रहरीले पुस १३ गते गिरफ्तार गरिएको बिरोधमा महेन्द्र नमूना माध्यमिक विद्यालयमा कार्यरत शिक्षक तथा विद्यार्थीहरुले पुस १६ गतेदेखि आन्दोलन सुरु गरेपछि महेन्द्र नमूना माध्यमिक विद्यालयको पठनपाठन अवरुद्ध हुनगई पुस १९ गतेदेखि सुरु हुनगइरहेको अर्ध वार्षिक परीक्षा समेत स्थगित गरिएको छ ।

नौगाड गाउँपालिका–६ निवासी महेन्द्र नमूना माध्यमिक विद्यालयमा कक्षा ८ मा अध्ययनरत विद्यार्थी १५ वर्षीय सागर धामीलाई शिक्षक मल्लले कुटपिट गरेको आरोपमा प्रहरीले पुस १३ गते गिरफ्तार गरेको थियो ।

कुटपिटबाट बालकको कानको जाली फुटेको भन्दै पीडित पक्षले पुस १३ गते जिल्ला प्रहरी कार्यालय, दार्चुलामा उजुरी दिएपछि शिक्षक मल्ललाई गिरफ्तार गरी अनुसन्धान भइरहेको जिल्ला प्रहरी कार्यालय, दार्चुलाका इन्स्पेक्टर भाष्कर चन्दले इन्सेक प्रतिनिधिसँगको भेटमा बताउनु भयो ।

शिक्षकको कुटपिटबाट पुस ६ गते घाइते भएका बालकको स्वास्थ्य परीक्षण गर्दा कानको जाली फुटेको भन्ने मेडिकल रिपोर्ट आएपछि शिक्षक मल्लकाविरुद्धमा प्रहरीमा उजुरी दिएको पीडितका बुबा अन्तराम धामीले इन्सेक प्रतिनिधिसँगको फोन सम्पर्कमा बताउनु भयो ।

गिरफ्तार गरिएका शिक्षक मल्ललाई रिहा गर्नु पर्ने माग गर्दै जिल्ला प्रशासन कार्यालय र महाकाली नगरपालिकामा पुस १६ गते नै विद्यालय परिवारको तर्फबाट ज्ञापन पत्र बुझाएका छन् ।

गिरफ्तार गरिएका शिक्षक मल्ललाई रिहा नगरेसम्म विद्यालयले सञ्चालन गर्दै आएका सम्पुर्ण शैक्षिक गतिविधि बन्द गरिएको र पुस १९ गतेदेखि सञ्चालन हुँने भनिएको अर्ध वार्षिक परीक्षा समेत अर्को सूचना जारी नभएसम्मका लागि स्थगित गरिएको ज्ञापन पत्रमा उल्लेख गरिएको विद्यालयका प्रधानाध्यापक रामदत्त जोशीले बताउनु भयो ।

उहाँले भन्नु भयो– ‘घटनालाई आपसी समझदारीबाट समाधान गर्ने उपाय हँुँदाहुँदै पनि एक पक्षीय ढङ्गले मुद्दा दर्ता गरी समग्र शिक्षकको मनोबल गिराउने काम भयो । शिक्षकलाई बजारमा हतकडी लगाएर लगिदा समग्र बालबालिका र शिक्षकहरु आक्रोसित भएका छन् । पठनपाठक र परीक्षा समेत स्थगित भएको छ ।’

कुटपिटबाट घाइते बालको जिल्ला अस्पताल, दार्चुलामा उपचार हुँन नसकेपछि उनको थप उपचार पुस ८ गते धनगढीस्थित माया मेट्ट्रो अस्पतालमा गरिएको थियो ।

नरेन्द्रसिह कार्की