शिक्षकको लापरवाहीले चार महिनादेखि विद्यार्थीको पठनपाठन प्रभावित

  ०७५ भदौ ५ गते

नाम्खा गाउँपालिका-६ स्थित तीनवटा विद्यालयमा शिक्षकको लापरवाहीका कारण चार महिनादेखि विद्यार्थीको पठनपाठन प्रभावित भएको छ ।

हिमालपारीको गाँउको रूपमा चिनिएको लिमीका तीन वटै विद्यालयमा ०७५ वैशाखदेखि शिक्षकहरू नजाँदा विद्यार्थीहरूको पठनपाठनमा समस्या भएको सोही गाउँका स्थानीयबासी रिञ्जिन लामाले आरोप लगाए ।

विद्यालयमा शिक्षकहरू उपस्थित नभएपछि सुनखानी प्रावि, भृकुटी प्रावि र हिमशिखर प्रावि रहेका छन् । ६ जना शिक्षकको दरबन्दी भए पनि हाल भने सुनखानी प्रावि हल्जिमा मात्र एक जना शिक्षकले विद्यालय खोल्ने गरेको भए पनि पठनपाठन नगरेको लामाको आरोप छ ।

विद्यालयको पठनपाठनको अवस्थाका विषयमा नियमित रूपमा नियमनकारी निकायले अनुगमन नगर्दा वर्षौँदेखि लिमीका विद्यालयहरू यो अवस्थाबाट गुज्रँदै आएका हुन् ।

लिमीका विद्यालयहरू मध्ये सुनखानी प्रावि हल्जिका लालबहादुर बुढा र हिमशिखर प्रावि हल्जिका ओमप्रकाश जैसी परीक्षा दिने भन्दै वैशाखमा नै लिमीबाट सदरमुकाम सिमकोट गए लगत्तै जिल्ला बाहिर गएको जानकारी आएको र भृकुटी प्रावि जाङ्का शिक्षक सुरबिर बुढा केही दिन विद्यालयमा उपस्थित भएर घरतिर लागेको वडा अध्यक्ष पाल्जोर लामाले आरोप लगाए ।

विगतका वर्षहरू जस्तै यो वर्षपनि त्यस्तै समस्या भएको अध्यक्ष लामाले बताए । दुई/दुई वटा कोटाको दरबन्दी भएको विद्यालयमा एक/एक जना शिक्षकले ०७४ फागुन र चैत महिनामा अध्यापन गराएपनि ०७५ को वैशाखबाट शिक्षक उपस्थित हुन छोडेपछि तीन वटै विद्यालयका करिव १ सय ५० जना विद्यार्थीहरू पठनपाठन र अर्धवार्षिक परीक्षा दिनबाटसमेत वञ्चित भएको वडा अध्यक्ष लामाको आरोप छ ।

तीन वटै विद्यालयका प्रधानाध्यापक धर्मनन्द लामा, राजबहादुर ऐडी र कर्णजित बुढा प्रधानाध्यापक भए पनि तीनै जना हाल सिमकोटमा बस्दै आएका छन ।

विद्यालयकै आर्थिक कारोवारका लागि सिमकोट आएको र विद्यालयमा फर्कने तयारीमा रहेको भएपनि बुवाको मृत्युको कारण विद्यालय जान नसकेको र अव चाँडै विद्यालयमा हाजिर हुने प्रअ बुढाले बताए ।

शिक्षा विकास तथा समन्वय इकाईका प्रमुख वर्षबहादुर फडेराका अनुसार सो विद्यालयमा गर्मी समयमा पनि हिमपात हुने भएकोले शिक्षक बस्न मान्दैनन् र आफूलाई विदामा आएको पनि जानकारी गराउँदैनन् । त्यसैले पनि त्यहाँको अवस्था थाहा हुदैन ।

स्रोत व्यक्ति जयरुद्र ढकाललाई अबको एक हप्तामा पठाउने र त्यो बेलासम्म सो विद्यालयमा शिक्षक नै उपस्थित नभएमा कारबाहीको प्रकृया अघि बढाउने बताए । उनले भने-'आफूले विद्यालयमा जान आग्रह गरे पनि आयोगको परीक्षाको लागि तयारी गर्दैछौँ भनेर जबाफ दिने गरेका छन् ।'


नन्द सिंह