शिक्षकको कुटपिटका कारण विद्यार्थीको मृत्यु, कुटपिटमा संलग्न शिक्षक गिरफ्तार

  ०७६ असार २५ गते

शिक्षकको कुटपिटबाट घाइते भएका भीमदत्त नगरपालिका–१७ मझगाउँस्थित महाकाली बाल विद्यालयमा अध्ययनरत १३ वर्षीय छात्र माधव कलौनीको उपचारका क्रममा असार २४ गते राति मृत्यु भएको छ ।

कक्षा नौमा अध्ययनरत कलौनीलाई असार १३ गते विद्यालयमै कुटपिट गरेको उनका बाबु बृहस्पती कलौनीले बताए ।

मृतक कलौनीका बाबुले प्रधानध्यापक यशोदा जोशी, शिक्षकत्रय लक्ष्मणदत्त भट्ट, हर्क जाग्री र दुर्गादत्त पाठकले कुटपिट गरेर घाइते बनाएको आरोप लगाए । कुटपिटबाट कलौनीको टाउको र छातिमा चोट लागेको थियो भने दायाँ गोडा भाँचिएको थियो ।

कुटपिटबाट घाइते छोराको उपचार डडेल्धुराको उपक्षेत्रीय अस्पताल, महाकाली, सेती, नेपालगञ्जको शिक्षण अस्पताल हुँदै भारतको बरेलीसम्म लगिएको भए पनि बचाउन नसकिएको कलौनीले बताए ।

मृतक माधवको शव पोष्टमार्टमका लागि भारतको बरेलीबाट महाकाली अञ्चल अस्पताल महेन्द्रनगर ल्याउदै गरिएको प्रहरीले जनाएको छ ।

कुटपिटमा संलग्न भएको भन्ने किटानी उजुरी आएपछि विद्यालयका प्रिन्सिपल यशोदा जोशी, शिक्षक दुर्गादत्त पाठक, लक्ष्मण भट्ट र हर्क जाग्रीलाई असार २५ गते गिरफ्तार गरी अनुसन्धान भइरहेको जिल्ला प्रहरी कार्यालयका एसपी दिनेश आचार्यले बताए ।


कोमलनिरन्जन भाट