विभिन्न जिल्लामा सुरक्षा सम्वेदनशील मतदान केन्द्रको पहिचान

  ०७४ असार ६ गते

दोस्रो चरणमा स्थानीय तहको निर्वाचन गर्न लागिएको विभिन्न जिल्लामा जिल्ला सुरक्षा समितिले सम्वेदनशील मतदान केन्द्रको पहिचान गरिएको इन्सेकका जिल्ला प्रतिनिधिहरूले जनाएका छन् ।

इन्सेक बाजुरा जिल्ला प्रतिनिधि पदम सिंहका अनुसार ७० मतदान स्थल र ९२ मतदान केन्द्र तोकिएको बाजुरा जिल्लाका मुख्य निर्वाचन अधिकृत हेमबहादुर सेनले जानकारी दिए ।

यसमा ३३ ओटा अति सम्वेदनशील, ३० ओटा सम्वेदनशील र नौ ओटा सामान्य रहेको विश्लेषण गरी सोही अनुसारको सुरक्षा प्रबन्ध मिलाएको जनाइएको छ ।

निर्वाचन कार्यालय बाजुराले निकालेको अन्तिम मतदाता नामावली अनुसार ३२ हजार ५ सय २१ पुरूष, ३२ हजार ४ सय २७ महिला र दुई जना तेस्रो लिङ्गी गरी ६४ हजार ९ सय ५० जनाले मताधिकार प्रयोग गर्न पाउने भएको जिल्ला निर्वाचन अधिकारी शुभद्रा गौतमले जानकारी दिइन् ।

इन्सेक दाङ जिल्ला प्रतिनिधि जेएन सागरका अनुसार जिल्ला सुरक्षा समितिले दाङका १ सय ३६ मतदान स्थल सम्वेदनशील रहेको जनाएको छ । त्यस्तै चार मतदान स्थल अति सम्वेदनशील र ११ मतदान स्थल सामान्य रहेको जिल्ला सुरक्षा समितिका संयोजक तथा प्रमुख जिल्ला अधिकारी मेघनाथ काफ्लेले बताए ।

१ सय ५१ मतदान स्थल र ३ सय ५१ मतदान केन्द्र रहेको दाङमा शहरी क्षेत्रका मतदानस्थल सुरक्षित र सामान्य रहेको सुरक्षा समितिले जनाएको छ ।

दुर्गम तथा नेपाल-भारत सिमानाका मतदान स्थललाई अति सम्वेदनशील मतदान स्थलका रूपमा वर्गीकरण गरी सुरक्षा रणनीति तर्जुमा गरेको जिल्ला प्रहरी कार्यालय दाङका एसपी धिरजप्रताप सिंहले बताए ।

सुरक्षा समितिले दाङमा नेपाल कम्युनिष्ट पार्टीले सडक सञ्जालले नजोडिएको क्षेत्र र नेपाल-भारत खुला सीमा नाकालाई सुरक्षा चुनौतीको रूपमा लिएको जनाइएको छ । २ लाख ९१ हजार १ सय ५० मतदाता सङ्ख्या रहेको दाङमा निर्वाचन सुरक्षाका लागि २ हजार ३ सय सुरक्षाकर्मी परिचालन गरिने एसपी सिंहले बताए । दाङमा दुई उपमहानगरपालिका, एक नगरपालिका र सात गाउँपालिका छन् ।

इन्सेक भोजपुर जिल्ला प्रतिनिधि किरण राईका अनुसार स्थानीय तह निर्वाचनको क्रममा जिल्लाको ५६ मतदान केन्द्र सुरक्षाका दृष्टिले सम्वेदनशील क्षेत्रका रूपमा पहिचान गरिएको छ ।

भौगोलिक आधारसँगै निर्वाचनविरूद्ध गतिविधि गर्ने समूहहरूका कारण उक्त क्षेत्र सुरक्षाका कारण सम्वेदनशील क्षेत्र रहेको छ । निर्वाचनको सुरक्षा सतर्कताका लागि नेपाल प्रहरी र म्यादी प्रहरी खटाइसकेको जिल्ला निर्वाचन कार्यालयले जनाएको छ । ८७ मतदानस्थल तथा १ सय ४१ मतदान केन्द्रका लागि आवश्यक पर्ने ४ सय ९२ जना म्यादी प्रहरी खटाइएको निर्वाचन अधिकृत केवलप्रसाद रेग्मीले जानकारी दिए ।

जिल्ला सुरक्षा समितिले ५६ मतदान केन्द्रलाई सुरक्षाका दृष्टिले सम्वेदनशील केन्द्र रहेको पहिचान गरेको छ । अन्य ८५ केन्द्र सामान्य रहेको समितिले जनाएको छ । सुरक्षामा समस्या आउने देखिएमा तत्काल नेपाली सेनाका दुई ओटा हेलिकप्टरले समेत सुरक्षा दिने व्यवस्था गरिएको छ । दुई नगरपालिका, सात गाउँपालिका र ८१ वडामा १ लाख ५ हजार ५ सय ४७ मतदाता छन् ।

इन्सेक प्यूठान जिल्ला प्रतिनिधि रविन्द्र पाण्डेका अनुसार जिल्ला सुरक्षा समितिले जिल्लाका ३५ ओटा मतदान स्थल अति सम्वेदनशील रहेको जनाएको छ । १ सय ८६ ओटा मतदानस्थल र १ सय ५१ मतदान केन्द्र रहेकोमा ३५ ओटा मतदानस्थल अति सम्वेदनशील रहेको समितिले निष्कर्षनिकालेको हो ।

स्थानीय तहको निर्वाचनलाई मध्यनजर गरी सुरक्षा व्यवस्था मजवुद बनाउन जिल्लामा विभिन्न मतदान केन्द्र र मतदान स्थललाई वर्गीकरण गरी सोही अनुसारको सुरक्षा व्यवस्था मिलाइएको प्रमुख जिल्ला अधिकारी यदुनाथ पौडेलले जानकारी दिए ।

प्यूठानमा दुई नगरपालिका र सात गाउँपालिका रहेका छन् । जिल्लामा कूल मतदाता सङ्ख्या १ लाख २७ हजार ४ सय ४७ जना रहेको निर्वाचन कार्यालय जनाएको छ ।

इन्सेक दार्चुला जिल्ला प्रतिनिधि नरेन्द्र सिंह कार्कीका अनुसार दार्चुलाका नौ ओटा तहका ११ ओटा मतदान केन्द्र अति सम्वेदनशली रहेको जिल्ला सुरक्षा समिति दार्चुलाले जनाएको छ । एक नगरपालिकासहित तीन गाउँपालिकाका उक्त मतदान केन्द्रहरू अति सम्वेदनशील रहेको जनाएको हो ।

जिल्लाभरीका १ सय १० ओटा मतदान स्थलमा १ सय २८ मतदान केन्द्र रहेका छन् । जसमा १० ओटा सम्वेदनशीलमा राखिएकेा जिल्ला प्रहरी कार्यालयका डिएसपी केदार खनालले जानकारी दिए । जिल्लामा ७३ हजार ५१ जना मतदाता रहेका छन् । जिल्लामा पुरूष मतदाता ३६ हजार ७ सय २८ र महिला मतदाता ३६ हजार ३ सय २३ जना रहेका छन् ।

जिल्लाको सबैभन्दा टाढाको मतदान केन्द्र व्यास गाउँपालिकाको वडा नम्बर १ को मोती महिला सङ्घ आधारभूत विद्यालय टिङ्कर हो । जहाँ ९४ पुरूष र १ सय ५ महिला गरी १ सय ९९ मतदाता छन् भने सोही वडाको कैलाशपति माध्यमिक विद्यालय छाङ्गरूमा १ सय ४५ पुरूष र १ सय ७३ महिला गरी ३ सय १८ जना मतदाता रहेका छन् ।

व्यास गाउँपालिकाको यी दुवै मतदान केन्द्रमा पुग्न सदरमुकाम खलङ्गाबाट चार दिनको पैदल दुरीमा पर्छ । अहिले निर्वाचनको लागि मतदान केन्द्र व्यासमै कायम गरिएको कारण मतदाताहरू समेत व्यास जान सुरू गरेको नगेन्द्र तिंकरीले जानकारी दिए ।

निर्वाचनमा खटिने कर्मचारी र मत पेटिकासहितको टोली असार ७ गते खलङ्गाबाट हिँड्ने गरी तयारी भएको जिल्ला प्रहरी कार्यालयका डिएसपी केदार खनालले जानकारी दिए । भौगोलिक रूपमा विकट भएको कारण कडा सुरक्षा व्यवस्थाका साथ नेपालकै बाटो भएर व्यास पठाउन लागिएको हो । व्यासका मतदाता भने, भारतीय बाटोको प्रयोग गर्दै जाने गरेका छन् ।

व्यास सदरमुकाम खलङ्गाबाट २९ कोष टाढा पर्छ । यस्तै सदरमुकाम खलङ्गाबाट टाढा रहेको अपि हिमाल गाउँपालिकाको वडा नम्वर १, २, ३ मा पनि कर्मचारी पठाउने तयारी गरेको छ । सदरमुकाम खलङ्गाबाट दुई दिनको दुरीमा पर्ने अपि हिमाल गाउँपालिकाको घुसा खण्डेश्वरी २६ कोषको दुरीमा रहेको छ ।


अनलाइन डेस्क