विप्लव नेतृत्वको नेकपाका कार्यकर्ता अदालत परिसरबाटै पुनः गिरफ्तार

  ०७६ जेठ ३ गते

नेत्रविक्रम चन्द (विप्लव) नेतृत्वको नेपाल कम्युनिष्ट पार्टीमा आवद्ध भएको आरोपमा गिरफ्तारीमा परेकामध्ये दुई जना धरौटी बुझाएर रिहा भए लगत्तै जेठ २ गते अदालत परिसरबाटै पुन ः गिरफ्तारीमा परेका छन् ।

४७ वर्षीय फुर्वा शेर्पा र २९ वर्षीय विदुर शेर्पालाई अदालत गेटबाहिरबाट गिरफ्तार गरेको अधिवक्ता वेदनिधि पौडेलले बताए ।

दुवै जनाले अदालतमा जनही ३ लाख ५४ हजार रुपियाँको मूल्याङ्कन गरी घरजग्गाको धनीपूर्जा धरौटी बुझाएर तारेखमा छुटेको अदालतका श्रेष्तेदार केदार गौतमले बताए ।

उनीहरूलाई जेठ १० गते तारेख तोकिएको पनि प्रहरीले पुनः गिरफ्तार गरेका कारण तारेखको कारवाही बारे के हुने भन्ने निश्चित नभएको श्रेस्तेदार गौतमले बताए ।

फक्ताङलुङ गाउँपालिका–१ का फुर्वा र २ का विदुरलाई करिब महिनादिन अघि आठराई त्रिवेणी गाउँपालिका–३ स्थित हाङपाङबाट गिरफ्तार गरेको अधिवक्ता पौडेलको भनाई छ ।

अधिवक्ता पौडेलका अनुसार उनीहरूसहित मेरिङदेन गाउँपालिका–२ सान्थाक्राका ३१ वर्षीय निमा शेर्पालाई एकै समयमा प्रहरीले गिरफ्तार गरेको थियो । जिल्ला प्रहरी कार्यालयका डिएसपी संञ्जयसिंह थापाले गिरफ्तारबारे अनभिज्ञता प्रकट गरे ।


देवराज गुरूङ