समाचारहरू

छविसपाथिभेरा गाउँपालिकाको–३ स्थित बान्नीचौर माध्यामिक विद्यालयको व्यवस्थापन समितिको चुनाव सकेर घर फर्किने क्रममा सोही गाउँपालिका–३ का २७ वर्षीय अमृत सिंहमाथि खुंडा प्रहार गरी माघ १३ गते साँझ हत्या गरिएको छ ।

विद्यालय व्यवस्थापन समितिको चुनावको परिणाम घोषणा भइसकेपछि घर फर्किरहेको अवस्थामा छविसपाथिभारा गाउँपालिका– २ का ३२ वर्षीय ज्ञानबहादुर कडायत र २८ वर्षीय प्रकाश ऐडी लगायतका व्यक्तिहरुले छबिसपाथिभारा गाउँपालिका–३ झरखेल्लामा खुँडा प्रहार गरी हत्या गरेको पीडितका दाजु लोकेन्द्र सिंहले इन्सेक प्रतिनिधिसँग फोनबाट बताउनु भयो ।

हत्या घटनामा सङ्लग्न ज्ञानबहादुर कडायतलाई खुँडा सहित घटनास्थलबाट गिरफ्तार गरिएको र फरार रहेका सोही ठाउँका २८ वर्षीय प्रकाश ऐडी, ३० वर्षीय केदार ऐडी र छविसपाथिभारा गाउँपालिका–२ का वडाध्यक्ष ३७ वर्षीय विकास ऐडीलाई माघ १४ गते थलारा गाउँपालिकाबाट गिरफ्तार गरी अनुसन्धान भइरहेको जिल्ला प्रहरी कार्यालय, बझाङका डिएसपी रुपक खड्काले बताउनु भयो ।

शबको पोष्टमार्टमका लागि जिल्ला अस्पताल सिमखेतमा राखिएको छ भने घटनामा सङ्लग्न व्यक्तिहरुलाई कडा कार्वाहीको माग गर्दै नेपाली काङ्ग्रेस  समर्थक नेपाल विद्यार्थी संघ, बझाङले सदरमुकाम चैनपुर बजार बन्द गर्दै नाराजुलुस गरिरहेका छन् ।

रमेश के सी