विद्यालय भवन जीर्ण हुदाँ पानी चुहिने समस्या

  ०७६ पुस २९ गते

२०७२ साल बैशाख १२ गतेको भूकम्पले विद्यालय भवन जिर्ण बन्दा चुमनुव्री गाउँपालिका–३ को बुद्ध मावि सिर्दिवासका शिक्षक विद्यार्थी समस्यामा परेका छन् ।

२०६३ मा ढुङ्गाको छाना राखेर बनाइएको विद्यालय भवनको बाहिरी रुप राम्रो देखिएपनि पानी चुहिने समस्या थपिएको विद्यालयका प्रधानाध्यापक प्रकाश घिमिरेले बताउनुभयो ।  ढुङ्गाको छाना भएको ६ ब्लकमा कक्षा संचालन भएको छ ।

‘जाडो याममा ढुङ्गाको छाना मुनी बस्न न्यानो त हुन्छ,’ विद्यालयका प्रअ घिमिरेले भन्नुभयो–‘भूकम्पले छानाको ढुङ्गा यता र उता बनाइ दिएपछि बर्खामा पानी चुहिने समस्या थपियो ।’

अहिले भौतिक संरचनाको अवस्था नाजुक बनेको उनले बताए । विद्यालय मर्मत गर्नै एक करोड लाग्ने उहाँले बताए । विद्यालय भवनको केहि भागको गारो पनि चर्किएको छ ।

भूकम्पले भत्काएका गोरखाका अधिकाशं विद्यालयका भवन बनिसकेको छ । तर बुद्ध मावि सिर्दिवासको भवन निर्माणको जिम्मा भने कसैले नलिएको घिमिरेले बताए ।

‘अरु विद्यालय सविधा सम्पन्न बनिसकेका छन्, तर हाम्रोमा लाइब्रेरी र प्रयोगशाला सम्म छैन,’ उनले भने । झ्यालमा ग्रिल नहुँदा महत्वपुर्ण सामग्रीको सुरक्षामा चुनौती देखिएको घिमिरे बताउछन् ।

‘६०–७० वटा कम्प्यूटर छन्, जोगाउनै  गाह्रो  छ,’ उनले भने ।

सुरुमा भारतीय दुतावासले बुद्ध मावि सहित १० विद्यालयको भवन निर्माणको जिम्मा लिएको थियो  तर अन्तिम समयमा आएर भारतीय दुतावासले बुद्घ मा वि को भवन निर्माण नगर्ने भएपछि समस्या थपिएको हो ।

चुमनुव्री सडक सञ्जालले नजोडिएको ठाउँ भएको र निर्माण सामाग्री ढुवानीका लागी खच्चडकै भर पर्नुपर्ने बाध्यत रहेकाले असजिलो हुने देखेर कुनै पनि संघ संस्थाले भवन निर्माणको जिम्मा नलिएको अभिभावको गुनासो छ ।

विद्यालय बनाइदिन दातृ निकाय र भूकम्प पुननिर्माण प्राधिकरण जिल्ला आयोजना कार्यान्वयन इकाइ(भवन) समक्ष माग पनि गरिएको उनले बताए ।

उक्त विद्यालय भवन निर्माणका लागी दातृ निकाय सँग छलफल गरिरहेको भूकम्प पुननिर्माण प्राधिकरण जिल्ला आयोजना कार्यान्वयन इकाइ (भवन) का प्रमूख विष्णु प्रसाद मिश्रले बताए । जाइकालाई भवन बनाइदिन प्रस्ताव गरेको उनको भनाइ छ ।

बुद्ध मावि मा ३ सय ९७  विद्यार्थी छन् । ती मध्ये एक सय ८९ विद्यार्थीले हिमाली छात्रवृद्घिको कोटामा अध्ययन गर्दै आएका छन् ।

 


हरिराम उप्रेती