समाचारहरू

बाँफिकोट गाउँपालिका– २ मा रहेको जनकल्यान माध्यामिक विद्यालयको नियमित पठनपाठन बन्द गरेर विद्यालय परिसरमा मेला सञ्चालन गर्दा विद्यार्थी मर्कामा परेका छन् ।

तत्कालीन नेकपा माओवादीले गरेको सशस्त्र युद्ध थालेको २५ वर्ष पुगेको अवसरमा मेला आयोजना गरेर विद्यालय बन्द गरीएको हो ।

तत्कालिन माओवादीले सशस्त्र संघर्ष थालेको २०५२ साल फागुन १ को सम्झनामा चार दिनदेखि विद्यालयको पठनपाठन पूर्ण रुपमा रोकेर मेला सञ्चालन गरिएको छ ।

विद्यालयमा मेला आयोजना गरिँदा त्यसको प्रत्यक्ष असर विद्यार्थीमा परेको कक्षा ९ का विद्यार्थी डिलबहादुर खत्रीले बताउनुभयो ।

कोभिड संक्रमणको त्रासका कारण लामो समय बन्द रहेको विद्यालयलाई चालु शैक्षिक सत्र भित्र निर्धारित पठ्याभार कसरी सम्पन्न गर्ने र शैक्षिक उपलब्धी हासिल गर्ने भन्ने चुनौती हुँदा हुँदै केहि शिक्षक, अभिभावक, सरकार र सरोकारवाला कै मिलेमतोमा विद्यालय बन्द गरीएको शिक्षकहरूले गुनासो गरेका छन् ।

जनकल्यान माध्यामिक विद्यालयका प्रधानाध्यापक झुपिलाल पौडेलले विद्यालयमा मेला आयोजना नगरौं भन्दाभन्दै बाँफिकोट गाउँपालिका– २ को कार्यालयले जबर्जस्ती मेला सञ्चालन गरेको बताउनुभयो ।

विद्यालयमा चलिरहेको मेला अझै केही दिनसम्म चल्ने बाँफीकोट गाउँकार्यपालिका सदस्य मनबहादुर बादीले जानकारी दिनुभयो ।

विद्यालय नै बन्द गरेर मेला सञ्चालन गरिनु दुःखद भएको स्थानीयको भनाई छ ।

मनिषा केसी