विद्यार्थीमाथि कुटपिट घटनाकी आरोपित शिक्षिका गिरफ्तार

  ०७६ जेठ २१ गते

ढिलो विद्यालय आएको निँहुमा विद्यार्थीहरूमाथि कुटपिट गरेको आरोपमा प्रहरीले रुन्टीगढी गाउँपालिका–८ मगरगोरीस्थित भानु आधारभूत विद्यालयकी शिक्षिका २६ वर्षीया लक्ष्मी पुनलाई जेठ २० गते गिरफ्तार गरेको प्रहरीले जनाएको छ ।

आरोपित शिक्षिकाले जेठ १२ गते ढिलो गरी विद्यालय आएको भन्दै कक्षा १ देखि ८ सम्मका १४ जना विद्यार्थीलाई कुटपिट गरी घाइते गराएको भन्दै पीडित पक्षले जेठ १९ गते इलाका प्रहरी कार्यालय होलेरीमा उजुरी दिएपछि गिरफ्तार गरिएको डिएसपी दिपक खड्काले बताए ।

आरोपितलाई अभद्र व्यवहार अन्तर्गतको कानुनी कारवाहीका लागि जिल्ला अदालतबाट म्याद थप गरी  अनुसन्धान भइरहेको डिएसपी खड्काले बताए ।

प्रधानाध्यापक झगबहादुर भण्डारी गाउँपालिकाको एसआईटी तालिममा होलेरी गएका बेला निमित्त प्रधानाध्यापकको जिम्मेवारी पाएकी लक्ष्मीले विद्यार्थीमाथि भाँचिएको कुर्सीको खुट्टाले कुटपिट गरेको विद्यार्थीहरूको भनाई छ ।

घटनापछि जेठ १४ गते अभिभावकहरुले विद्यालयमा ताला लगाई आफूहरूले रकम सङ्कलन गरेर निजी स्रोतबाट राखेको शिक्षिकाले आफ्नै छोराछोरीहरूलाई कुटपिट गरेको भन्दै शिक्षिकालाई बर्खास्त गर्न माग गरेका थिए ।

विद्यालय व्यवस्थापन समितिका अध्यक्ष समेत रहेका वडाध्यक्ष भीमबहादुर पुनको पहलमा घाइते विद्यार्थीहरूको उपचार शिक्षिकाले गरिदिने र शिक्षिकालाई निष्काशन गर्ने सहमतिमा मिलापत्र भएको थियो ।

तर, जेठ १५ गते शिक्षिकाले उपचार खर्च पनि दिनुपर्ने, कारवाही पनि भोग्नु पर्ने भन्दै विरोध गरेपछि घटना इलाका प्रहरी कार्यालय होलेरीमा पुगेको थियो ।

प्रहरीले जेठ १६ गते गाउँपालिकाका अध्यक्ष बालाराम बुढा, गाउँपालिकाका शिक्षा शाखाका प्रतिनिधि, अभिभावक र पीडित विद्यार्थीलगायतलाई बोलाएर छलफल गरेको थियो ।

स्थानीयका अनुसार एक वर्षअघि पनि शिक्षिका पुनको कुटपिटबाट एक जना विद्यार्थीको कानमा समस्या भएको थियो ।


माधवकुमार ओली