विकास बजेट दुरुपयोग सम्बन्धमा समाचार लेखेको भन्दै पत्रकारलाई कुटपिट

  ०७३ भदौ २९ गते

वेङ्गाडावर गाविस-२ घर भई मिथिला नपा-७ बस्ने २७ वर्षीय पत्रकार राजकमल भनिने रामकमल सिंहलाई विकास बजेट दुरुपयोग सम्बन्धमा समाचार लेखेको भन्दै गोठकोयलपुर-२ निवासी धनुषा क्षेत्र नम्बर १ का काङ्ग्रेस सभापति २५ वर्षीय नविन गोहिवारको नेतृत्वमा आएको एक समूहले भदौ २९ गते बिहान भानुचोकमा कुटपिट गरेको पीडितले आरोप लगाएका छन् ।

जिल्ला विकास समिति र संसदीय क्षेत्र विकास कोषको रकम दुरुपयोग भएको विषयमा समाचार लेखेको भन्दै आफूलाई काङ्ग्रेसका कार्यकर्ताले कुटपिट गरेको पीडित पत्रकारले आरोप लगाएका हुन् ।

आफ्नो राजनैतिक चरित्र बदनाम गराउने गरी समाचार लेखेको भन्दै काङ्ग्रेस नेता गोहिवारलगायत गोहिवारसँगै गाडीमा आएका सात-आठ जनाको समूहले न्युज २४ टेलिभिजन, अनलाइन खबर र अभियान दैनिक धनुषाका सम्वाददाता सिंहलाई घेरा हालेर मुक्का र लातीले कुटपिट गरेको कान्तिपुर दैनिकका सम्वाददाता श्यामसुन्दर शशिले बताए । टाउकोको पछाडि भागमा चोट लागेका पत्रकार सिंहको जनकपुर अञ्चल अस्पतालमा उपचार भएको पनि शशिले जानकारी दिए ।

धनुषाको १ नम्बर क्षेत्रस्थित गोठकोयलपुरको सडक निर्माणमा ठूलो आर्थिक अनियमितता भएको समाचार पत्रकार सिंहले भदौ २८ गते लेखेका थिए । सोही समाचारको निहुँमा आफूमाथि अमानवीय तरिकाले आक्रमण गरेको भन्दै पत्रकार सिंहले भदौ २९ गते कानुनी कारबाही गर्न माग गर्दै जिल्ला प्रहरी कार्यालयमा उजुरी दिएका छन् ।

समयमा घटनास्थलमा स्थानीय पुग्न नसकेको भए आफूलाई अपहरण गरी बेपत्ता बनाउने शैलीमा आक्रमणकारी प्रस्तुत भएको पत्रकार सिंहले बताए ।

यसैबीच पत्रकार सिंहलाई कुटपिट गरेको आरोपमा काङ्ग्रेस नेता गोहिवार, विषरभोरा-९ का २५ वर्षीय पुष्पेन्द्र गोइत र धनौजी-८ का ३० वर्षीय सञ्जीवकुमार मण्डल, माचिझिटकैयाका २५ वर्षीय सन्तोष यादवलगायत पाँच जनालाई भदौ २९ गते प्रहरीले घटनास्थलबाट गिरफ्तार गरेको छ ।

घटनामा संलग्नलाई कानुन बमोजिम कारबाही गरिने जिल्ला प्रहरी कार्यालयका एसपी लालमणी आचार्यले बताए ।

पत्रकार महासंघ, प्रेस सेन्टर, प्रेस चौतारीलगायतका पत्रकारितासँग जोडिएका संस्थाहरूले घटनाको भर्त्सना गर्दै घटनामा संलग्नलाई कानुनको दायरामा ल्याएर कारबाही गर्न माग गरेका छन् ।


विनोदकुमार रविदास