समाचारहरू

दिक्तेलरूपाकोट मझुवागढी नगरपालिकाले लक डाउनको समयमा मजदूरहरूलाई वितरण गरेको राहत वास्तविक मजदूरहरूले नपाएको गुनासो गरेका छन् ।

नगरपालिकाले ज्यालादारी मजदूर बाहेक अन्य आयश्रोत नभएका परिवारलाई पहिचान गरेर खाद्यान्न वितरण गर्ने भनिए ५ नम्बर वडा लफ्याङकाकतिपय वास्तविक ज्यालादारी मजदूरले खाद्यान्न नपाएको गुनासो गरेका छन् ।

लक डाउनका कारण काम गर्न नपाउँदा मारमा परेका ज्यालादारी मजदूर परिवारलाई ‘भोको नराख्ने’ नीति अनुसार नगरपालिकाले वडा कार्यालयमार्फत चामल, दाल, नुन, तेल लगायतका खाद्यान्न वितरण सुरू गरेको छ ।

वडामा हुनेखानेले खाद्यान्न पाउँदा ज्यालादारी काम गर्नेले केही नपाएको स्थानीय ४० वर्षीया भद्रीसरी मुग्रातीले गुनासो गर्नुभयो । ‘हामी गरिव र एकल महिलालाई राहत दिएनन् ।’ वडाध्यक्षले हुनेखानेलाई दिए–‘मुग्रातीले भन्नुभयो–‘घरमा खाने अन्न छैन । वडाध्यक्षलाई कुरा राख्दा नाम नै टिपाइएको छैन भन्नु भो ।’

गुन्द्री र टपरी बुनेर जीवीको चलाउँदै आउनुभएकी लफ्याङकै ९० वर्षीया गजुरमायाँ राईले पनि पहुँचवालाले मात्र खाद्यान्न पाएको गुनासो गर्नु भएको छ । लकडाउनको मारमा परेको अवस्थामा पैसाको अभाव भइरहेको अवस्थामा सामाजिक सुरक्षा भत्ता वितरणमा समेत वडाको ध्यान नगएको राईको भनाइ छ ।

वडाध्यक्ष निर्मल राईले वास्तविक मजदूरलाई मात्र राहत वितरण गरिएको बताउनुभयो । लफ्याङमा १ सय ३ घरलाई खाद्यान्न वितरण गरिएको छ । एकल परिवारलाई १० केजी र एकजना भन्दा बढी सदस्य भएका परिवारलाई १५ केजीका दरले खाद्यान्न वितरण गरिएको वडा कार्यालयले जनाएको छ । नगरपालिकाले चैत २२ गतेदेखि राहत वितरण शुरू गरेको छ ।

यसैबीच दिक्तेल रुपाकोट मझुवागढी नगरपालिकाले दिक्तेलबजारमा कोरोना भाइरसको जिवाणु नष्ट गर्ने रसायन छर्किन शुरू गरेको छ । कोरोना भाइरस रोकथाम तथा नियन्त्रणका नगरपालिकाले दिक्तेलबजारको विभिन्न ठाँउमा सोडियम हाईपोक्लोराइड नामक डिसइन्फेक्ट्यान्ट छर्किन सुरू गरेको हो ।

चैत २८ गतेदेखि दिक्तेलको जिरोपोइन्टदेखि रत्नपार्क, संगमपार्क, पुरानो बेसक्याम्प, त्रिबेणीचोक, भवनगैरा लगायतका क्षेत्रमा सोडियम हाईपोक्लोराइड छर्किएको नगरपालिकाले जनाएको छ ।

 

रामधन राई