वाम गठबन्धनका उम्मेदवारलाई लक्षित गरी बम विष्फोट

  ०७४ मङ्सिर १९ गते

वाम गठबन्धनको तर्फबाट प्रतिनिधिसभाका उम्मेदवार खगराज भट्टलाई लक्षित गरी बम विष्फोट गराइएको समाचार इन्सेक डडेल्धुरा जिल्ला प्रतिनिधि भुपेन्द्र विष्टले पठाएका छन् ।

मङ्सिर १८ गते परशुराम नगरापालिकामा आयोजित चुनावी सभा कार्यक्रम सकेर जिल्ला सदरमुकाम फर्किने क्रममा आलिताल गाउँपालिका-८ बाख्खोली भन्ने ठाउँमा राति ८ः३० बजे विष्फोट गराइएको जिल्ला प्रहरी कार्यालय डडेल्धुराले जनाएको छ ।

बम विष्फोटबाट भट्ट चढेको म १ च २४१५ नम्बरको गाडीको अगाडिको भागमा क्षति पुगेको छ । बम कसले विष्फोट गराएको हो भन्ने नखुलेको र घटनाको अनुसन्धान भइरहेको प्रहरीले जनाएको छ । विष्फोटपछि उम्मेदवार भट्टलाई प्रहरीले स्कटिङ गरी जिल्ला सदरमुकाम ल्याएको थियो ।

त्यसैगरी कञ्चनपुर जिल्ला प्रतिनिधि कोमल निरञ्जन भाटका अनुसार कञ्चनपुर क्षेत्र नम्बर-३ नेपाली काङ्ग्रेसबाट प्रतिनिधि सभा सदस्य उमेदवार रमेश लेखकको वेदकोट नपा-८ स्थित घरमा मङ्सिर १८ गते राति बम विष्फोट भएको छ ।

मोटरसाइकलमा आएका अज्ञात व्यक्तिहरूको समूहले करिब ८ बजे राति लेखकको घरमा बम विष्फोट गराएको बताइएको छ । विष्फोटबाट रूखमा सामन्य क्षति भएको जिल्ला प्रहरी कार्यालयका डिएसपी ज्ञानबहादुर सेठीले वताए ।

बम विष्फोट गराउने समूहको खोजी भइरहेको र घटनाको अनुसन्धान जारी रहेको जिल्ला प्रहरी कार्यालयले जनाएको छ ।


अनलाइन डेस्क