लामो समयदेखि अबरुद्ध एक्स-रे सेवा पुनः चालु

  ०७३ कत्तिक १९ गते

इन्सेक अनलाइनलगायत विभिन्न सञ्चार माध्याममा एक्स-रे सेवा अवरुद्ध हुँदा बिरामी मर्कामा परेको समाचार प्रकाशन र प्रशारण भएपछि जिल्ला अस्पताल बैतडीले नयाँ एक्स-रे मेसिन ल्याएको छ । ०७३ कात्तिक ६ गते इन्सेक अनलाइनमा लामो समयसम्म एक्स-रे मेसिन नबनाउँदा बिरामी मारमा शीर्षकको समाचार प्रकाशन भएको थियो ।

विगत दुई महिनादेखि अबरुद्ध जिल्ला अस्पताल बैतडीको एक्स-रे सेवा पुनः चालु भएको छ । विगत २५ वर्षपुरानो एक्स-रे मेसिन फेरेर कात्तिक १९ गतेदेखि नयाँ एक्स-रे मेसिनबाट सेवा चालु गरिएको हो ।

पुरानो एक्स-रे मेसिनमा खराबी आएपछि विगत दुई महिनादेखि जिल्ला अस्पतालमा एक्स-रे सेवा प्रभावित बनेको थियो ।

एक्स-रेका लागि जिल्ला अस्पतालमा आएका बिरामीहरू महङ्गोमा भारतको पिथौरागढमा उपचार गराउन बाध्य भएका थिए ।

'पाँच दिन अघि बाँया गोडामा चोट लाग्यो । आर्थिक अभावले बाहिर जान सकिनँ । आज एक्स-रे सेवा सुचारु भयो भन्ने सुनेर एक्स-रे गर्न आएको हुँ ।' दशरथचन्द नपा-२ मडलाकी इश्वरी पन्तले भनिन् ।

पहिले एक्स-रे सेवा प्रभावित हुदाँ दैनिक १० देखि १५ जनासम्म बिरामीहरू भारतको पिथौरागढ जाने गर्दथे तर कात्तिक १९ गते सेवा सुचारु भएकै दुई घण्टा भित्र १० जना भन्दा बढीले सेवा लिइसकेको जिल्ला अस्पताल बैतडीले जनायो ।

'पुरानो एक्स-रे मेसिन पटक-पटक बिग्रने समस्या भएकाले यसपालि नयाँ मेसिन ल्याएका हौँ ।'- जिल्ला स्वास्थ्य कार्यालय बैतडीका सूचना अधिकारी भुवनदेव जोशिले भने ।

अब हाडजोर्नि र एक्स-रे कै असुविधाका कारण बिरामीहरू भारतसम्म जानु नपर्ने जिल्ला अस्पताल बैतडीका प्रमुख डक्टर गुणराज अवस्थीले बताए ।


नरी बडु