समाचारहरू

सरकारले लकडाउनको अवधि आठ दिन थप गरेर ०७७ वैशाख ३ गतेसम्मलाई पुर्‍याएको छ । चैत २४ गते बसेको मन्त्रिपरिषद्को बैठकले वैशाख ३ गतेसम्म लकडाउन लम्ब्याउने निर्णय गरेको हो ।

कोरोना भाइरस (कोभिड-१९)को दोस्रो सङ्क्रमित भेटिएपछि सरकारले चैत ११ गतेबाट चैत १८ गतेसम्मका लागि पहिलो पटक लकडाउन घोषणा गरेको थियो ।

त्यो अवधि पूरा नहुँदै २५ गतेसम्म लकडाउन अवधि थप गरिएको थियो । यो अवधिमा कोरोना सङ्क्रमण स्थानीय स्तरमा भेटिएपछि सरकारले एक स्थानीय तहबाट अर्को स्थानीय तहमा समेत आवतजावतमा कडाइ गरेको थियो ।

कोरोना रोकथाम तथा नियन्त्रण समन्वय समितिमा नरहेका मन्त्रीहरूलाई अतिरिक्त जिम्मेवारी दिने निर्णय पनि बैठकले गरेको छ ।

अर्थसहित सूचना तथा सञ्चार मन्त्रालयको समेत जिम्मेवारी सम्हालिरहनुभएका सरकारका प्रवक्ता युवराज खतिवडाका अनुसार, भौतिक पूर्वाधार तथा यातायात व्यवस्थामन्त्री वसन्त नेम्वाङलाई प्रदेश १ र भूमि व्यवस्था, सहकारी तथा गरिबी निवारणमन्त्री पद्मा अर्याललाई गण्डकी प्रदेशसँग समन्वय गर्ने जिम्मा दिइएको छ ।

वन तथा वातावरणमन्त्री शक्ति बस्नेतलाई कर्णाली प्रदेश सरकारसँग समन्वय गर्न भनिएको छ । प्रदेश ५ सँग समन्वय गर्ने जिम्मा ऊर्जा तथा जलस्रोत मन्त्री वर्षमान पुनलाई दिइएको छ भने श्रम, रोजगार तथा सामाजिक सुरक्षामन्त्री रामेश्वर राय यादवलाई प्रदेश २ सँग समन्वय गर्न भनिएको छ ।

खानेपानी तथा सरसफाइमन्त्री बिना मगरले भने सुदूरपश्चिम सरकारसँग समन्वय गर्ने अधिकार पाउनुभएको सरकारका प्रवक्ता डा. खतिवडाले सञ्चारकर्मीलाई जानकारी दिनुभएको छ ।

संसदमा उपस्थिति दलसँग समन्वय गर्न कानुन, न्याय तथा संसदीय मामिलामन्त्री डा. शिवमाया तुम्बाहाम्फेले पाउनुभएको छ ।

महिला बालबालिका तथा ज्येष्ठ नागरिक मन्त्री पार्वत गुरुङले महिला, बालबालिका र ज्येष्ठ नागरिकहरूको अवस्थाबारे र युवा तथा खेलकुद मन्त्री जगत विश्वकर्मालाई स्वयम्सेवक व्यवस्थापन गर्ने गरी जिम्मेवारी तोकिएको खतिवडाले जानकारी दिनुभएको छ ।

अनलाइन डेस्क