रोकिराखिएका दुई वटा ट्रकमा आगजनी

  ०७५ साउन २९ गते

नेत्रविक्रम चन्द (विप्लव) नेतृत्वको नेपाल कम्युनिष्ट पार्टीका प्रवक्ता खड्गबहादुर विश्वकर्मासहितका नेताको रिहाइको माग गर्दै सो पार्टीले आह्वान गरेको नेपाल बन्दका क्रममा गैँडाकोट नपा-२ भृकुटी चोकमा रोकिराखेको दुई वटा ट्रकमा आगजनी भएको छ ।

पूर्व पश्चिम महेन्द्र राजमार्ग अन्तर्गत पर्ने भृकुटी चोक नजिकै रोकिरहेको ना २ ख ८४८७ नम्बरको ट्रक र ना २ ख २५४८ नम्बरको पश्चिमबाट पूर्वतर्फजाँदै गरेको पराल बोकेको ट्रकमा साउन २९ गते अज्ञात समूहले आगजनी गरेको जिल्ला प्रहरी कार्यालय, नवलपरासी (वर्दघाट सुस्ता पूर्व)ले जनाएको छ ।

जिल्ला प्रहरी कार्यालय नवलपरासी (बर्दघाट सुस्ता पूर्व)का एसपी रमेश थापाले बिहान १ बजेको समयमा अज्ञात समूहले आगजनी गरेको जानकारी दिए ।

थापाका अनुसार आगजनीको सूचना प्राप्त गरेपछि प्रहरीले चितवनको भरतपुर महानगरपालिकाको दमकलको सहयोगमा आगो निभाएको थियो । ट्रकमा आगजनी गर्ने व्यक्तिहरूको खोजी भइरहेको जिल्ला प्रहरी कार्यालय नवलपरासी (बर्दघाट सुस्ता पूर्व)ले जनाएको छ ।


तिर्थराज डुम्रे