रूकुमका दुई मतदान केन्द्रमा शान्तिपूर्ण तरिकाले मतदान सम्पन्न

  ०७४ मङ्सिर १५ गते

मङ्सिर १० गते मतदान स्थगित भएका रूकुम (पश्चिम) का दुई मतदान केन्द्रमा मङ्सिर १५ गते शान्तिपूर्ण ढङ्गले पुनःमतदान सम्पन्न भएको छ ।

बाँफिकोट गाउँपालिका र आठबिसकोट नगरपालिकाका दुई मतदान केन्द्रमा मङ्सिर १० गते भएको मतदानको क्रममा मतपेटिकामा एसिड हालेर आगो लागेपछि मतदान स्थगित भएको थियो ।

बाँफिकोट गाउँपालिका-५ को रत्न आधारभुत विद्यालय काँडाको (क) मतदान केन्द्रमा प्रतिनिधि सभा सदस्यको लागि र आठबिसकोट नगरपालिका-११ को नेपाल राष्ट्रिय मावि गतसैनाको (ख) मतदान केन्द्रमा प्रदेश सभा तथा प्रतिनिधि सभा सदस्यतर्फको समानुपातिकको लागि मतदान भएको हो ।

रत्न आधारभुत विद्यालय काँडा (क) मतदान केन्द्र बाँफिकोट-५ मा ६ सय ७२ मतदाता मध्ये १ सय ९९ महिला र १ सय पुरूष गरी ३ सय ९७ मतदाताले मतदान गरेको मतदान अधिकृत तेजप्रसाद पौडेलले जानकारी दिए । यसअघिको मतदानमा बाँफिकोटमा २ सय ४६ मत खसिसकेपछि मतपेटिकामा आगो लगाइएको थियो ।

त्यसैगरी ७ सय ५६ मतदाता रहेको आठबिसकोटमा ३ सय २१ मत खसेको मतदान अधिकृत कर्ण कुँवरले जानकारी दिएका छन् । यस अघि आठबिसकोटमा ३ सय ३ मत खसिसकेपछि मतपेटिकामा आगो लगाइएको थियो ।


मनिषा केसी