रामेछापमा १ सय भन्दा बढी स्वास्थ्यकर्मीको पद रिक्त, स्वास्थ्य सेवा प्रभावित

  ०७३ भदौ २५ गते

रामेछापमा १ सय भन्दा बढी स्वास्थ्यकर्मीको दरबन्दी रिक्त रहेको जिल्ला स्वास्थ्य कार्यालयले जनाएको छ । नागरिकलाई निःशुल्क स्वास्थ्य सेवा प्रवाह गर्ने सरकारी स्वास्थ्य संस्थामा दरबन्दी अनुसारका स्वास्थ्यकर्मी नहुँदा स्वास्थ्य सेवा प्रभावित भएको हो ।

जिल्ला स्वास्थ्य कार्यालय रामेछापका प्रमुख प्रकाशप्रसाद साहका अनुसार अहिले रामेछाप जिल्लाका विभिन्न स्वास्थ्य संस्थाहरूमा १ सय ६ जना स्वास्थ्यकर्मीको दरबन्दी रिक्त रहेको छ ।

दरबन्दी अनुसार स्वास्थ्यकर्मी नहुँदा स्वास्थ्य सेवा प्रवाहमा समस्या भएको साहले बताए । 'दुई चार जना भएपो यता उता गरेर मिलाउनु, १ सय भन्दा बढी दरबन्दी खाली भएपछि कसरी मिलाउनु ?'-साहले भने । उनले जनशक्तिको अभावले जिल्लाका धेरै स्वास्थ्य संस्थाहरू थोरै जनशक्तिले धान्न बाध्य भएको बताए ।

रिक्त रहेका दरबन्दीहरूमा पदपूर्तिको लागि लोकसेवा आयोगमा लेखी पठाएको उनले बताए । तर, आएका कर्मचारीहरूको एकै पटक केन्द्रले सरुवा गरिदिँदा समस्या हुने गरेको उनले बताए । पछिल्लो समय एकैचोटी ३५ जना स्वास्थ्यकर्मीको सरुवा भएको उनले बताए । ती ठाउँमा अन्य कर्मचारी नपठाएकोले समस्या परेको उनको भनाइ छ ।


नवराज पथिक