यौन दुर्व्यवहार घटनाका आरोपित गिरफ्तार

  ०७४ चैत १७ गते

चार वर्षीया बालिकालाई यौन दुर्व्यवहार गरेको आरोपमा प्रहरीले मर्चवारी गाउँपालिका-६ का २७ वर्षीय पिन्टु भन्ने सच्चीकुमार हरिजनलाई आरोपितको घरबाटै चैत १६ गते गिरफ्तार गरेको छ ।

पीडित बालिकालाई आरोपितले चैत १४ गते यौन दुर्व्यवहार गरेको आरोपमा पीडित पक्षले चैत १६ गते इलाका प्रहरी कार्यालय मर्चवारीमा उजुरी दिएको थियो । पीडित पक्षले दिएको उजुरीका आधारमा आरोपितलाई अनुसन्धानका लागि गिरफ्तार गरिएको इलाका प्रहरी कार्यालयका इन्सपेक्टर थमनबहादुर रजालीले बताए । पीडित बालिकाको स्वास्थ्य परीक्षण चैत १६ गते नै भिम अस्पताल भैरहवामा गरिएको छ ।

त्यसैगरी १२ वर्षीया बालिकालाई यौन दुर्व्यवहार गरेको आरोपमा प्रहरीले जिल्ला बरेली ठाना फरिदपुर ग्राम फरिदपुर उत्तर प्रदेश भारत स्थायी घर भई कपिलवस्तु जिल्ला शुध्द्धोधन गाउँपालिका-२ इँटाभट्टामा काम गर्ने २४ वर्षीय मोहमदरसिद मुसलमानलाई चैत १६ गते लुम्बिनीबाट गिरफ्तार गरेको छ ।

पीडित बालिकालाई आरोपितले चैत १६ गते यौन दुर्व्यवहार गरेको आरोपमा पीडित पक्षले सोही दिन इलाका प्रहरी कार्यालय लुम्बिनीमा उजुरी दिएको थियो ।

पीडित बालिकाको आमाले दिएको उजुरीका आधारमा प्रहरीले कारवाही अगाडि बढाएको इलाका प्रहरी कार्यालय लुम्बिनीका असई विजय धवलले बताए । पीडित बालिकाको स्वास्थ्य परीक्षण चैत १६ गते नै भिम अस्पताल भैरहवामा गरिएको छ ।

त्यसैगरी १७ वर्षीया बालिकालाई यौन दुर्व्यवहार गरेको आरोपमा प्रहरीले मायादेवी गाउँपालिका-७ स्थायी घर भई सियारी गाउँपालिका भगदरी बस्ने ४० वर्षीय दयाशङ्कर केवटलाई सियारीबाटै चैत १६ गते गिरफ्तार गरेको छ ।

पीडित बालिकालाई आरोपितले चैत १६ गते यौन दुर्व्यवहार गरेको आरोपमा पीडित बालिकाकी  आमाले आरोपितविरुद्ध जिल्ला प्रहरी कार्यालय रुपन्देहीमा उजुरी दिएकी थिइन् ।

पीडित बालिकाको आमाले दिएको उजुरीका आधारमा प्रहरीले कारवाही अगाडि बढाएको जिल्ला प्रहरी कार्यालय रुपन्देहीका डिएसपी डिल्लीनारायण पाण्डेले बताए । पीडित बालिकाको स्वास्थ्य परीक्षण चैत १६ गते नै भिम अस्पताल भैरहवामा गरिएको छ ।


रीमा बि.सी.