यौन दुर्व्यवहार घटनाका आरोपित गिरफ्तार

  ०७७ भदौ २४ गते

चार वर्षीया बालिकालाई यौन दुर्व्यवहार गरेको आरोपमा प्रहरीले पोखरा मनपा–५ मालेपाटन गोलचौताराका ७८ वर्षीय एकनारायण बराललाई प्रहरीले भदौ २३ गते गिरफ्तार गरेको छ ।

पीडितलाई आरोपितले ०७६ चैत्र १९ गते एक्लै भएको अवस्थामा दुर्व्यवहार गरेको भन्दै पीडितकी आमाले भदौ २२ गते जिल्ला प्रहरी कार्यालय कास्कीमा उजुरी दिनुभएको थियो ।

पीडित पक्षले इज्जत र डरको कारण घटना बाहिर आउन नसकेको तर घटना भएको करिब ६ महिनापछि भदौ २१ गते स्थानीय जनप्रतिनिधि, पीडित परिवार, आरोपितका परिवार सहित बसेको भेलामा आरोपितले गल्ती स्वीकार गर्नुभएको पीडितकी ठूलीआमाले इन्सेक प्रतिनिधीलाई बताउनुभयो ।

पीडितपक्षको उजुरीपछि आरोपितलाई गिरफ्तार गरी अनुसन्धान अगाडी बढाइएको जिल्ला प्रहरी कार्यालय कास्कीका डिएसपी सुवास हमालले जानकारी दिनुभयो ।

पीडितको स्वास्थ्य परीक्षण भदौ २३ गते पोखरा स्वास्थ्य विज्ञान प्रतिष्ठानको पश्चिमाञ्चल क्षेत्रीय अस्पतालमा गरिएको थियो ।


सुशन घिमिरे