यौन दुर्व्यवहार घटनाका आरोपित गिरफ्तार

  ०७६ असोज २ गते

१२ वर्षीया बालिकालाई यौन दुर्व्यवहार गरेको आरोपमा प्रहरीले त्रिपुरासुन्दरी नपा–२ रुमस्थित वडा कार्यालयको सुरक्षार्थ खटिएका प्रहरी चौकी, त्रिपुराकोटका ३९ वर्षीय प्रहरी हवल्दार दानबहादुर जिसीलाई असोज १ गते गिरफ्तार गरेको छ ।

पीडित बालिकालाई आरोपितले असोज १ गते बेलुकी मदिरा सेवन गरी यौन दुर्व्यवहार गरेको भन्दै पीडित पक्षले सोही समय प्रहरी चौकी, त्रिपुराकोटमा मौखिक उजुरी दिएको थियो ।

पीडित पक्षको उजुरी लगत्तै घटनाका आरोपितलाई गिरफ्तार गरेर जिल्ला प्रहरी कार्यालय, डोल्पामा पठाएको प्रहरी चौकी, त्रिपुराकोटका सई टेकबहादुर देउवाले जानकारी दिए ।

आरोपितलाई रातारात जिल्ला पठाइएको भन्दै स्थानीयले असोज २ गते प्रहरी चौकी घेराउ गर्दै ढुङ्गामुढा समेत गरेका गरेका थिए ।

जिल्ला प्रहरी कार्यालय, डोल्पाका डिएसपी नारायण रञ्जितकारले यौन दुर्व्यवहार घटनाका आरोपितलाई जिल्ला प्रहरी कार्यालय, डोल्पास्थित हिरासतमा राखेर घटनाको अनुसन्धान गरिरहेको जानकारी दिए ।

पीडित बालिकाको स्वास्थ्य परीक्षण असोज २ गते जिल्ला अस्पताल, दुनैमा गरिएको प्रहरीले जनाएको छ ।


विष्णुप्रसाद देबकोटा