यौन दुर्व्यवहार घटनाका आरोपित गिरफ्तार 

  ०७५ पुस २९ गते 

कक्षा दशमा अध्यायनरत छात्रालाई यौन दुर्व्यवहार गरेको आरोपमा प्रहरीले गैँडाकोट नपा–११ मा रहेको मुकुन्दसेन बोर्डिङ स्कुलका प्रधानाध्यापक राजेन्द्र पौडेललाई पुस २८ गते गिरफ्तार गरेको छ ।

एसइई परीक्षाको तयारीका लागि कोचिङ कक्षा लिइरहेकी छात्रालाई प्रधानाध्यापक पौडेलले पुस २८ गते संवेदनशील अङ्गमा हात पुर्‍याएको भन्दै पीडित छात्राले अभिभावकलाई जानकारी गराएपछि घटना बाहिर आएको पीडित पक्षको आरोप छ ।

घटना बाहिर आएपछि पीडित पक्षले विद्यालय घेराउ गरेका थिए । विद्यालय घेराउको क्रममा प्राप्त मौखिक उजुरीको क्रममा आरोपित प्रधानाध्यापक पौडेललाई गिरफ्तार गरेको इलाका प्रहरी कार्यालय गैँडाकोटका इन्स्पेक्टर लोकबहादुर जिसीले बताए ।

घटनास्थलको वातावरण र मौखिक उजुरीका आधारमा प्रधानाध्यापकलाई गिरफ्तार गरिएको भएपनि हालसम्म प्रहरीमा लिखित उजुरी नपरेको इन्स्पेक्टर जिसीले बताए । घटनाको विषयमा थप अनुसन्धान भइरहेको उनले जानकारी दिए ।


तिर्थराज डुम्रे