यौन दुर्व्यवहार गरेको कसुरमा ६ वर्ष कैद सजायको फैसला

  ०७७ मङ्सिर २६ गते

१३ वर्षीया बालिकालाई यौन दुर्व्यवहार गरेको कसुरमा जिल्ला अदालतले १७ वर्षीय बालकलाई मङ्सिर २५ गते ६ वर्ष कैद सजायको फैसला सुनाएको छ ।

न्यायाधीश प्रकाश राउतको इजलासले कसुर गरेको ठहर गर्दै कैद सजायसँगै ३५ हजार रुपियाँ जरिबानाको फैसला भएको श्रेस्तेदार ऋतु राईले इन्सेक प्रतिनिधिसँगको फोन सम्पर्कमा बताउनु भयो ।

पीडित बालिकालाई आरोपितले ०७६ चैत ९ गते यौन दुर्व्यवहार गरेको आरोपमा पीडित पक्षले आरोपितविरूद्ध चैत १० गते जिल्ला प्रहरी कार्यालयमा उजुरी दिएको थियो ।

पीडित पक्षको उजुरीका आधारमा प्रहरीले आरोपितलाई चैत २२ गते गिरफ्तार गरी जिल्ला अदालतमा वैशाख २ गते यौन दुर्व्यवहार शीर्षकमा मुद्दा दर्ता गरी कारबाही अघि बढाएको थियो ।

जिल्ला अदालतको ०७७ वैशाख २ गतेको आदेशमा आरोपित ५० हजार रुपियाँ धरौटी बुझाएर रिहा भएका थिए ।

पीडित बालिकाको स्वास्थ्य परीक्षण जिल्ला अस्पतालमा ०७६ चैत १० गते गरिएको थियो ।


देवराज गुरुङ