यूपीआरमा बालअधिकारसम्बन्धमा प्राप्त सुझावबारे छलफल गर्न कार्यशाला सुरु

  ०७३ साउन ३२ गते

बालबालिका शान्ति क्षेत्र तथा बाल संरक्षण अभियानको सहकार्यमा विश्वव्यापी आवधिक समीक्षा (यूपीआर) २०१५ मा बालअधिकारसम्बन्धी प्राप्त सुझाव र बालअधिकार महासन्धिमा नेपाललाई प्राप्त निष्र्कषणात्मक टिप्पणी २०१६ सम्बन्धी दुई दिने कार्यशाला गोष्ठि साउन ३२ गतेबाट ललितपुरमा सुरू भएको छ ।

Photo20160816Lalitpur

कार्यशालामा सहभागी बालबालिकासँग सम्बन्धित विभिन्न सङ्घसंस्थाले राष्ट्रिय तथा अन्तर्राष्ट्रिय रूपमा बालबालिकाको क्षेत्रमा भइरहेका विभिन्न प्रकारका हिंसा, विभेदलगायतका विषयमा विगतको समीक्षा गर्दै भविष्यमा गर्नुपर्ने कामका सम्बन्धमा सुझाव सङ्कलन गर्नेछन् ।

कार्यक्रममा राष्ट्रिय मानव अधिकार आयोगकी सदस्य मोहना अन्सारीले यूपीआरमा प्राप्त सुझावहरूको कार्यान्वयनका लागि नीतिगत तहमा सुधारको आवश्यकता रहेको औँल्याइन् ।

उनले बालबालिका विद्यालय जान नसक्नुमा गरिवी, धार्मिक र सामाजिक विभेद तथा बालक र बालिकामा हुने विभेद मुख्य कारक तत्व रहेको र नागरिक समाजको सहयोगबिना राष्ट्रिय मानव अधिकार आयोगले प्रभावकारी ढङ्गले काम गर्न नसक्ने हुँदा सरोकारवाला सबै पक्षको साझा प्रतिबद्धताको खाँचो रहेको बताइन् ।

इन्सेकका अध्यक्ष सुबोधराज प्याकुरेलले विश्वव्यापी आवधिक समीक्षामा नेपालले ७५ प्रतिशत सुझाव स्वीकारेको बताउँदै नेपालमा सरकार परिवर्तन भइरहने गरेकाले यूपिआरको सुझाव कार्यान्वयनको अनुगमन गर्न कठिन भएको बताए । कार्यक्रममा उनले अभिभावक वर्गको चेतनाले नै बालबालिकाको अधिकारको संरक्षण गर्ने विचार व्यक्त गरे ।

नागरिक शिक्षाको कमी भएको बताउँदै अध्यक्ष प्याकुरेलले यूपीआर राज्यको राजनीतिक विश्लेषण भएको उल्लेख गरे ।

प्रधानमन्त्री तथा मन्त्रीपरिषदको कार्यालयका सहसचिव रमेश ढकालले यूपीआरमा प्राप्त १ सय ९५ सुझावहरू मध्ये १ सय ५२ ओटा सुझाव स्वीकार गरिएको तथा ४३ ओटा सुझावहरू अस्वीकृत नभई तत्काल गर्न सक्दैनौ भनिएको बताए । उनले अन्तर्राष्ट्रिय प्रतिबद्धताहरूलाई मुलुकको वर्तमान अवस्थासँग कसरी तादम्यता ल्याउने भन्ने मुख्य कुरा भएको बताए । 'मानव अधिकारको अवस्थामा नेपाल निराश हुने अवस्थामा छैनौँ ।'- उनले भने ।

केन्द्रीय बाल कल्याण समितिका निर्देशक तारक धितालले नेपालले बालबालिकासम्बन्धी अन्तर्राष्ट्रिय सन्धि सम्झौतामा प्रतिबद्धता जनाएको भएपनि व्यवहारमा लागु हुन नसकेको उल्लेख गर्दै कार्यान्वयन पक्षमा जोड दिनु पर्ने बताए ।

साउन ३२ गतेबाट सुरू भएको गोष्ठी भदैा १ गते सम्म चल्ने आयोजकले जनाएको छ ।


रामकुमारी श्रेष्ठ