यातना पीडितद्वारा क्षतिपुर्तिको माग गर्दै जिल्ला प्रशासनमा निवेदन

  ०७६ मङ्सिर १२ गते

प्रहरीद्वारा यातना पाएका राप्ती सोनारी गाउँपालिका–२ कचनापुरका ४२ वर्षीय झुपबहादुर विष्टले अदालतको आदेश बमोजिम क्षतिपुर्तिको माग गदै जिल्ला प्रशासन कार्यालयमा मङ्सिर ११ गते निवेदन दर्ता गराउनुभएको छ ।

photo20191128banke
उहाँले अदालतको फैसला बमोजिम क्षतिपुर्ति रकम उपलब्ध गराई पाउँ भन्दै जिल्ला प्रशासन कार्यालय बाँकेका प्रमुख जिल्ला अधिकारी (सिडिओ) कुमारबहादुर खड्कालाई निवेदन पेश गर्नुभएको हो ।
सिडिओ कुमारबहादुर खड्काले क्षतिपुर्तिको लागि केन्द्रमा सिफारिस गर्ने बताउँदै अदालतको आदेश कार्यान्वयनमा पहल गर्ने बताउनु भयो ।
जिल्ला अदालतले घटनामा सङ्लग्न रहेको ठहर गर्दै ०७१ माघ २० गते असई बुद्धिप्रसाद शर्मा, हवल्दार धनबहादुर चन्द र प्रहरी जवान मानबहादुर थापालाई विभागीय कारबाहीका लागि लेखी पठाउने र पीडितलाई १ लाख रुपियाँ क्षतिपूर्ति दिन फैसला गरेको थियो ।

उक्त फैसलालाई उच्च अदालत तुलसीपुर नेपालगञ्ज इजलासले ०७३ मङ्सिर २१ गते जिल्ला अदालतको फैसलालाई सदर गरेको थियो ।
बाँकेको कुसुमबाट घर फर्कदै गर्दा अगैयामा नाचगान हेर्न पुगेका विष्टलाई प्रहरी हवल्दारसँग विवाद गरेको आरोपमा०७० साउन १ गते गिरफ्तार गरी प्रहरी चौकी अगैयामा यातना दिएको भन्दै पीडित विष्टले ०७० साउन ९ गते यातना दिनेलाई कारबाही र क्षतिपूर्ति माग गर्र्दै जिल्ला अदालतमा मुद्दा दायर गर्नु भएको थियो ।
प्रहरीको यातना र कुटपिटबाट उहाँको आँखा, टाउको, पिठ्युँ र दुवै घुँडाको माथिल्लो भाग, बाँया आँखा र छातिमा चोट लाग्नुका साथै दाँतसमेत भाँचिएको थियो । उक्त घटना इन्सेकद्वारा प्रकाशित नेपाल मानव अधिकार वर्ष पुस्तक २०१४ को पृष्ठ ५४८ मा समेत उल्लेख छ ।
पीडितले मुद्दा जितेपनि अदालतको फैसला कार्यान्वयन गर्नमा समस्या देखिएको अधिवक्ता बसन्त गौतमले बताउनु भयो ।


स्मृति देवकोटा