मेलम्ची खानपानी आयोजना क्षेत्रमा जिल्ला प्रशासन कार्यालयद्वारा कर्फ्यू आदेश जारी

  ०७६ भदौ २१ गते

मेलम्ची खानेपानी आयोजनाका मजदुरहरूले आफ्नो पारिश्रमिक पाउनु पर्ने माग गर्दै आन्दोलन गरेको तेस्रो दिन भदौ २० गते जिल्ला प्रशासन कार्यालयले मेलम्ची खानेपानी आयोजनास्थल वरपर कर्फ्यू लगाएको छ ।

प्रमुख जिल्ला अधिकारी गोमादेवी चेम्जोङले स्थानीय प्रशासन ऐन २०२८ को दफा ६ को (३) क अनुसार मेलम्ची खानेपानी आयोजनाको कार्यालय, मुहान, सुरुङ एरियामा हुलदङ्गा र अशान्ति हुन सक्ने सम्भावना देखिएकोले अर्को आदेश नभएसम्म अम्बाथान हेलम्बु गाउँपालिका–१, खानेपानी कार्यालय मेलम्ची नपा–११, ग्याल्थुम सुरुङमार्ग हेलम्बु गाउँपालिका–८ र सिन्धु सुरुङमार्ग जाने बाटो मेलम्ची नपा–१२ मा बिहान १० बजे देखि बेलुकी ५ बजेसम्म हुलदङ्गा गर्ने उद्देश्यले एकै ठाउँमा ५ जना भन्दा बढी मानिस जम्मा हुन नपाउने गरी कर्फ्यूको आदेश जारी गरेको सूचनामा उल्लेख गरिएको छ ।

मेलम्ची खानेपानी आयोजनाका मजदुरहरूले आफूले पाउनु पर्ने पारिश्रमिक पाउनु पर्ने माग गर्दै भदौ १८ गतेदेखि आन्दोलन गर्दै आएका छन् ।

आन्दोनकारीहरूको शान्तिपुर्ण आन्दोलनलाई दबाउन प्रमुख जिल्ला अधिकारीले कर्फ्यूको घोषणा गरेको आन्दोलनकारीहरूको आरोप छ ।

शान्ति सुव्यवस्था कायम गर्ने उद्देश्यले स्थानीय प्रशासन ऐनले तोकेको अधिकार प्रयोग गरेको प्रमुख जिल्ला अधिकारी गोमादेवी चेम्जोङले बताइन् ।


नातिबावु धिताल