मेयरद्वारा पत्रकारमाथि धम्की, सुरक्षाको माग गर्दै ज्ञापनपत्र

  ०७६ जेठ २३ गते

२८ वर्षीय पत्रकार विराट अनुपम (गौतम)लाई इटहरी उपमहानगरपालिकाका ५८ वर्षीय मेयर द्वारिक चौधरीले जेठ २१ गते नाक भाँच्ने धम्की दिएपछि पत्रकारहरूले सुरक्षाको माग गर्दै जेठ २३ गते प्रहरी र जिल्ला प्रशासन कार्यालयमा ज्ञापनपत्र बुझाएका छन् ।

इटहरी र धरानमा पत्रकारमाथि जेठ ८ र २१ गते धम्की दिएकाले पत्रकार असुरक्षित भएको भन्दै नेपाल पत्रकार महासङ्घ सुनसरीले सुरक्षाको माग गर्दै जेठ २३ गते सुनसरीका प्रमुख जिल्ला अधिकारी प्रेमप्रकाश उप्रेती र एसपी यज्ञविनोद पोखरेललाई ज्ञापन पत्र बुझाएको हो ।

महासङ्घ प्रदेश १, का अध्यक्ष विक्रम लुईटेल, महासचिव विवेक गौतम र सदस्यद्वय जयकृष्ण यादव र शशी कोइराला, महासङ्घका जिल्ला अध्यक्ष अमर खड्का सहितका पत्रकारले प्रशासन र प्रहरी कार्यालयमा पुगेर सुरक्षाको माग गर्दै ज्ञापनपत्र र ध्यानाकर्षण पत्र बुझाएका हुन् ।

मेयर चौधरीले जेठ २१ गते पत्रकार विराट अनुपमलाई सामाजिक सञ्जाल (फेसबुक) स्टाटसको विषयमा नाक भाँचिदिने सार्वजनिक धम्की दिएका थिए ।

उनले पत्रकार अनुपमको फेसबुकमा नकारात्मक कमेण्ट गरेपछि सो विषयमा अनुपमले जेठ २१ गते कमेण्टका विषयमा जिज्ञासा राख्दा मेयरले फोनमै नाक भाँच्न एक करोड छुट्टयाएको र आवश्यक परे १० करोड खर्च गर्न तयार रहेको टिप्पणी गरेको पीडित पत्रकारले बताए ।


जयकृष्ण यादव