मृतक चौधरीका परिवारलाई १० लाख रुपियाँ दिने निर्णय

  ०७४ मङ्सिर १४ गते

सरकारले बम विष्फोटनमा परी निधन भएका म्यादी प्रहरी विनोद चौधरीका परिवारलाई राहतस्वरुप १० लाख रुपियाँ दिने निर्णय गरेको राससले जनाएको छ ।

प्रधानमन्त्री एवम् गृहमन्त्री शेरबहादुर देउवाको अध्यक्षतामा मङ्सिर १३ गते बालुवाटारमा बसेको केन्द्रीय सुरक्षा समितिको बैठकले सो निर्णय गरेको गृहसचिव मोहनकृष्ण सापकोटाले जानकारी दिए । म्यादी प्रहरी चौधरी दाङको तुल्सीपुरमा सुरक्षामा खटिएका बेला मङ्सिर १२ गते विष्फोटमा घाइते भएका थिए । उपचारका क्रममा मङ्सिर १३ गते उनको निधन भएको हो ।

बैठकले निर्वाचन र शान्ति सुरक्षामा असर पार्न भएका बम विष्फोटन तथा आपराधिक गतिविधिलाई निस्तेज गर्न कानुन बमोजिम कडा कारबाही गर्ने निर्णय गरेको छ । साथै बैठकले त्यस्ता घटनामा परी घाइते भएका व्यक्तिको उपचार र सुरक्षाको समुचित व्यवस्था गर्ने निर्णय गरेको गृहसचिव सापकोटाले बताए ।


अनलाइन डेस्क