मानव अधिकार संरक्षण गर्ने दायित्व राज्यको होः मन्त्री चुमान

  ०७६ मङ्सिर २२ गते

७१ औँ अन्तर्राष्ट्रिय मानव अधिकार दिवस (१० डिसेम्बर २०१९) को सन्दर्भमा आयोजित तीन दिवसीय कार्यक्रममा गण्डकी प्रदेश मानव अधिकार महाभेला ०७६ को पहिलो दिन उद्घाटन समारोहमा रक्तदान कार्यक्रम गरेर मनाइएको छ ।

कार्यक्रमको उद्घाटनका क्रममा अन्तरिक मामिला तथा कानुन मन्त्री हरिबहादुर चुमानले मानव अधिकार भनेको मानव मर्यादा भएको बताउनुभएको छ । उहाँले मानव अधिकारको संरक्षण गर्ने दायित्व राज्यको भएको बताउनुभएकाे छ ।

‘सत्ताले मानव अधिकार हनन् गर्छ । हामी सबैले मानव अधिकारको सम्मान गर्न सिकौँ । मानव अधिकारको सवालमा सरकारले बजेटको व्यवस्थापनि गरेको छ । युवाहरूको सहभागितासँगै बढाएर जाने र यसको लागि सबैबाट पहल हुन जरुरी छ ।’–उहाँले भन्नुभयो ।

कार्यक्रममा बोल्दै एम्नेष्टी इन्टरनेशनल कास्कीका संयोजक रमेशप्रसाद बरालले एसिडको खुलेआम विक्री वितरणलाई नियमन गर्नुपर्ने बताउनुभयो ।

जिल्ला समन्वय समिति प्रमुख बैनबहादुर क्षेत्रीले दिगो विकासका लक्ष्यहरूले पनि मानव अधिकारको सवाललाई छोएको बताउनुभयो । सो अवसरमा २० जनाले रक्तदान गर्नुभएको थियो ।


इन्सेक गण्डकी प्रदेश कार्यालय, पोखरा