मानव अधिकार कार्य योजनासम्बन्धी अन्तरक्रिया कार्यक्रम सम्पन्न

  ०७७ फागुन १४ गते

मानव अधिकार सम्बन्धी पाँचौँ राष्ट्रिय कार्य योजनाको कार्यन्वयन विषयक अन्तरक्रिया कार्यक्रम फागुन १४ गते विदुरमा सम्पन्न भएको छ ।

राष्ट्रिय मानव अधिकार आयोगको आयोजनामा भएको कार्यक्रममा आयोगका मानव अधिकार अधिकृत खिमानन्द बस्यालले कार्य योजनाले समेटेका विषयबस्तु बारे जानकारी दिनुभएको थियो ।

आयोगले कार्ययोजनामा शिक्षा, स्वास्थ्य, खाद्य अधिकार, आवास, श्रम तथा रोजगार, बालअधिकार र बालन्याय, सामाजिक न्याय, सांस्कृतिक अधिकार, कानुनी सुधार तथा न्याय प्रशासन, हिरासत तथा कारागार सुधार, सङ्क्रमणकालीन न्याय मानव अधिकार शिक्षा लगायत १७ ओटा विषय समेटेको छ ।

कार्ययोजनाको कार्यन्वयन, समन्वयको लागि जिल्लामा जिल्ला समन्वय समितिको प्रमुखको संयोजकत्वमा र स्थानीय तहमा स्थानीय तह प्रमुखको संयोजकत्वमा कार्ययोजना समन्वय संयन्त्र रहने व्यवस्था रहेको मानव अधिकार अधिकृत बस्यालले जानकारी दिनुभयो ।

जिल्ला समन्वय समितिका प्रमुख सन्तमान तामाङ, प्रमुख जिल्ला अधिकारी झंकनाथ ढकाल लगायत सरोकारवालाहरुले स्थानीयस्तरमा मानव अधिकारको विषयहरूलाई मिहीन ढङ्गले लैजानु पर्नेमा जोड दिनु भएको थियो ।

सहभागीहरूले अधिकार उलङ्घनको घटनामा पीडित पक्षले क्षतिपूर्ति नपाउने समस्या देखिएकोले कानुनले भराएको क्षतिपूर्ति पीडक पक्षले दिन नसकेमा राज्यले नै भराइदिने व्यवस्था प्रभावकारी रूपमा गराउन आयोगले भूमिका खेल्नु पर्ने बताएका थिए ।


नवदीप श्रेष्ठ