मानव अधिकारको अवस्था अनुगमन गर्न द्रूत अनुगमन तथा कार्य टोली गठन

  ०७६ असार ४ गते

राष्ट्रिय मानव अधिकार आयोगले मानव अधिकार उल्लङ्घनका घटनाहरूको अनुगमन गर्न ‘द्रुत अनुगमन तथा कार्य टोली’ गठन गरेको छ ।

आयोगको कानुन, अनुसन्धान तथा अनुगमन विभागका निर्देशकको नेतृत्वमा यस्तो टोलीको गठन गरिएको आयोगले जनाएको छ ।

‘उक्त टोलीले काठमाडौँ उपत्यकालगायत देशका सम्पूर्ण भागमा घट्ने गम्भीर प्रकृतिका मानव अधिकार हनन्का विषयहरूलाई अनुगमन गरी आयोगमा तत्कालै प्रतिवेदन पेश गर्नेछ ।’–आयोगद्वारा असार ४ गते जारी विज्ञप्तिमा भनिएको छ ।

विगत केही समय यता भएका अभिव्यक्ति स्वतन्त्रता, सामाजिक तथा साँस्कृतिक अधिकार, दण्डहीनताको स्थिति, गैरकानूनी थुना, यातना, स्वास्थ्यको अधिकार, नियोजित पुनः पक्राउका घटना, दोहोरो भीडन्त र हत्या, विष्फोटन, जबर्जस्ती चन्दा, विधिको शासन विपरितका कार्य, अत्याधिक बल प्रयोग जस्ता घटनाहरूप्रति आयोग चिन्तित रहेको विज्ञप्तिमा उल्लेख छ ।

‘कुनै पनि अधिकार वहालीको लागि कानूनसम्मत मार्गको अबलम्बन गर्नु आमनागरिकको कर्तव्य हुन आउँछ । अधिकार संरक्षणको विषय सरोकारवालाहरूसँगको पर्याप्त संवाद र छलफलमा केन्द्रित हुनु पर्दछ । प्रत्येक विषयमा देखिने गरेका विरोध, प्रदर्शन र बल प्रयोगको स्थितिबाट मानव अधिकार संस्कृतिको निर्माणमा थप चुनौती सिर्जना हुने आयोगको निष्कर्ष रहेको छ ।’–विज्ञप्तिमा उल्लेख छ ।


अनलाइन डेस्क