समाचारहरू

इन्सेक नेपालगञ्ज, एडभोकेसी फोरम आइएचआरसीमा आवद्ध मानव अधिकारकर्मीहरूले फागुन १० गते  बाँके कारागारको अनुगमन गरेका छन् ।

अनुगमन टोलीले कैदी / बन्दीहरुलाई  भेटेर उनीहरूको अवस्था, स्वास्थ्य परीक्षण, व्यवस्थापन  , खानाको गुणस्तर, कानुन व्यवशायीसँग थुनुवाको पहुँचको अवस्था, मुद्दामा स्वतन्त्र रुपमा बयान गर्न पाए नपाएको लगायतका बिषयमा जानकारी लिएका थिए ।

अनुगमनका क्रममा कतिपय कैदी / बन्दीले मुद्दाको अवस्थाको बारेमा अदालतबाट जानकारी पाउन नसकेको गुनासो गरेका थिए । अनुसन्धानको अभावमा मुद्दामा कतिपय निर्दोष ब्यक्ति पनि गम्भीर फौजदारी मुद्दामा फस्ने गरेको कैदी बन्दीको गुनासो रहेको छ ।

जेलर राम कुमार सोनकरले बाँके कारागारको सुधारमा सहयोग गर्न सरोकारवालालाई आग्रह गर्नु भएको छ । ३ सय ५० क्षमताको बाँके कारागारमा हाल ७ सय ८३ कैदी बन्दी रहेको बताउदै टिनको छाप्रो मुनी बस्न बाध्य रहेको बताउनु भयो ।

अनुगमनका क्रममा  कारागारको सेप्टी टङकीको उचित ब्यवस्थापन हुन नसक्दा शौचालयबाट निस्कने फोहर खुल्ला रुपमा बग्नाले दुर्गन्ध फैलिएको बताउनु भयो । भवन जिर्ण रहेकोले बर्षातमा पानी डुब्ने समस्या रहेको र कारागारमा उत्तर र दक्षिणमा पर्खाल नभएको कारण सुरक्षा व्यवस्थापनमा चुनौति रहेको पाइएको छ ।

जेलर सोनकरले सुरक्षा व्यवस्थापनमा २५ जना नेपाल प्रहरीको दरबन्दी रहेकोमा हाल ९ जनाले मात्र सुरक्षा दिईरहेको र नेपाली सेनाका ३६ जनाले सुरक्षा दिइरहेको बताउनु भयो । उहाँले कारागारलाई व्यवस्थित गराउनको लागि सबै सरोकारवाला निकाय र अधिकारकर्मीहरूसँग आग्रह गर्नुभयो ।

अनुगमन टोलीमा एडभोकेसी फोरमका अधिवक्ता बसन्त गौतम र इन्सेक लुम्बिनी प्रदेश कार्यालय नेपालगन्जका प्रलेख अधिकृत विनोद पाण्डे, आइएचआरसीका विश्वजित तिवारी, अधिवक्ता बलबहादुर चन्द इन्सेक बाँके जिल्ला प्रतिनिधि स्मृति देवकोटा रहेका  थिए ।

स्मृति देवकोटा