समाचारहरू

महान्यायाधिवक्ताको कार्यालय, इन्सेक, जिल्ला बार इकाई, नेपाल पत्रकार महासङ्घसहितको एक टोलीले असोज १२ गते जिल्ला कारागार, जिल्ला प्रहरी कार्यालय र इलाका प्रहरी कार्यालय कल्याणपुरको अनुगमन गरेको छ ।

महान्याधिवक्ता कार्यालयका सह महान्यायाधिवक्ता गीताप्रसाद तिमल्सिना, सह न्यायाधिवक्ता खेमराज ज्ञवाली, उपन्यायाधिवक्ता टिकेन्द्र दाहाल, सहायक जिल्ला न्यायाधिवक्ता बद्रीकुमार कार्की, इन्सेक सप्तरीका प्रतिनिधि मनोहरकुमार पोखरेलसहितको टोलीले कारागारको बन्दी गृह र प्रहरी कार्यालयहरूको हिरासत कक्षको निरिक्षण गर्नुका साथै समस्याहरूबारे कैदीबन्दी, थुनुवाहरूसँग छलफल गरेको थियो ।

इन्सेक सप्तरी जिल्ला प्रतिनिधि मनोहरकुमार पोखरेलका अनुसार १ सय २५ जना कैदीबन्दी क्षमता रहेको जिल्ला कारागारमा कैद तोकिएका १ सय ८६ जना कैदी र कैद नतोकिएका १ सय ३१ जना थुनुवा गरी ३ सय १७ जना कैदीबन्दी रहेका छन् । ती मध्ये २१ जना महिला र दुई जना आश्रति बालबालिका छन् । जीर्ण कारागारमा झण्डै तीन गुणा कैदीबन्दीहरू कोचिएर बस्नुपर्ने अवस्थाले बस्न समस्या भएको चौकिदार जितेन्द्रप्रसाद यादवले बताए । यादवका अनुसार मानसिक सन्तुलन गुमेका चार जना कैदीहरू पनि सँगै रहेका छन् ।

बन्दीहरूले प्रहरी, सरकारी वकिल र अदालतमा तयार गरिने बकपत्रबारे अगावै जानकारी नहुनाले कानुन व्यवसायीसँग सल्लाह लिन नपाउने र तयार भइसकेको बकपत्रमा हस्ताक्षर गर्नुपर्ने अवस्था अन्त्य हुनुपर्ने माग गरे । हिँडडुल गर्ने ठाउँ नभएको, खेलकुद सामग्री नभएको, कुहिएको चामल र दुषित पानी खानु परेको, शौचालय र पुस्तकालयको अभाव रहेको, सीपमुलक तालिमको व्यवस्था नभएको कैदी जीवछीदेवी खङ्गले बताइन् ।

त्यसैगरी सिरहा जिल्ला प्रतिनिध दुर्गा परियारका अनुसार महान्याधिवक्ताको कार्यालयका प्रतिनिधिले असोज ११ गते सिराहको कारगार अनुगमन गरेका छन् ।

महान्याधिवक्ताको कार्यालयबाट सहमहान्याधिवक्ता गीताप्रसाद तिमल्सिना, खेमराज ज्ञवाली, इन्सेक जिल्ला प्रतिनिधिसहित अधिकारकर्मी, सञ्चारकर्मीको टोलीले सो अनुगमन गरेको हो ।

संविधानको धारा १५८ बमोजिम महान्याधिवक्ताको कार्यालयलाई कारागार तथा हिरासतको अनुगमनको अधिकार बमोजिम पहिलो पटक सिरहा कारागार तथा जिल्ला प्रहरी कार्यालयको हिरासत कक्ष अनुगमन गरेको सह महान्याधिवक्ता गिताप्रसाद तिमल्सिनाले बताए ।

१ सय ३५ जना क्षमता रहेको कारागारमा ३ सय ५३ जना कैदीबन्दी रहेकोले उनीहरूको अवस्था नाजुक रहेको तिमल्सिनाले बताए ।

इन्सेक उदयपुर जिल्ला प्रतिनिधि भरत खड्काका अनुसार सहन्यायधिवक्ता गीताप्रसाद तिमल्सिनाले जिल्ला कारागार र जिल्ला प्रहरी कार्यालय उदयपुरमा रहेका कैदीबन्दी तथा हिरासतमा राखिएका आरोपितहरूको अवस्थाका बारेमा निरिक्षण गरेका छन् ।

निरिक्षणका क्रममा उनले आरोपितलाई प्रहरीले थुनुवा पुर्जी नदिई हिरासतमा राखेको, म्याद थप नगरी हिरासतमा राखेको फेला पारेको बताएका छन् । त्यसैगरी कारागारको महिला कक्षको सुत्ने ठाउँ उपर्युक्त नभएको, खानेपानीको अभाव देखिएको, भवन जीर्ण भएकोले आवश्यक सुधारका लागि सुझाव दिएको तिमल्सिनाले बताए ।

इन्सेक पूर्वाञ्चल क्षेत्रीय कार्यालय