समाचारहरू

मध्यपश्चिमाञ्चल क्षेत्रका कारागारमा क्षमता भन्दा तेब्बर बढी कैदीबन्दी रहँदा बसोबासमा समस्या भएको छ । क्षेत्रीय प्रहरी कार्यालय सुर्खेतले दिएको तथ्याङ्क अनुसार मध्यपश्चिमाञ्चल क्षेत्रका १५ ओटा कारागारहरूको क्षमता ८ सय २० रहेपनि अहिले ती कारागारहरूमा २ हजार ५ सय कैदीबन्दी रहेका छन् ।

कारागारमा क्षमताभन्दा बन्दी धेरै हुँदा एउटै कोठामा २५/३० जना सुत्नुपर्ने समस्या भएको सुर्खेत कारागारका जेलर लालबहादुर खत्रीले बताए । जेलर खत्रीका अनुसार कैदीबन्दी धेरै हुँदा कैदीहरू पालैपालो सुत्ने, खाना पकाउने भाडाको अभाव, नुहाउन र शौचालय जान समस्या रहेको छ ।

तथ्याङ्क अनुसार २ सय जनाको क्षमता रहेको बाँके कारागारमा ६ सय ९ जना, १ सय जनाको क्षमता रहेको बर्दिया कारागारमा २ सय ४८ जना, १ सय जनाको क्षमता रहेको दाङ तुल्सीपुर कारागारमा २ सय १३ जना, ५० जनाको क्षमता रहेको दाङ्ग, घोराही कारागारमा १ सय ७७ जना, ५० जनाको क्षमता रहेको रोल्पा कारागारमा ७७ जना, १७ जनाको क्षमता रहेको कालीकोट कारागारमा ४३ जना, २५ जनाको क्षमता रहेको प्यूठान कारागारमा ६८ जना र २५ जनाको क्षमता रहेको सुर्खेत कारागारमा १ सय ७१ जना कैदीबन्दी रहेका छन् ।

त्यसैगरी २५ जनाको क्षमता रहेको जाजरकोट कारागारमा ४३ जना, २५ जनाको क्षमता रहेको हुम्ला कारागारमा ७२ जना, २५ जनाको क्षमता रहेको डोल्पा कारागारमा १७ जना, २० जनाको क्षमता रहेको जुम्ला कारागारमा ४० जना, २० जनाको क्षमता रहेको रुकुम कारागारमा ६५ जना, २० जनाको क्षमता रहेको सल्यान कारागारमा ६१ जना र १६ जनाको क्षमता रहेको दैलेख कारागारमा १ सय ६१ जना कैदीबन्दी रहेको तथ्याङ्कमा उल्लेख छ । मध्यपश्चिमाञ्चल क्षेत्रमा क्षमता भन्दा १० दोब्बर बढी दैलेख र सबैभन्दा कम डोल्पा कारागारमा कैदीबन्दी रहेका छन् ।

कूल ६ सय ५० जना पुरुष र १ सय ७० जना महिला कैदीबन्दी राख्ने क्षमता भएका ती कारागारहरूमा अहिले १ हजार ६ सय ३४ जना पुरुष र २ सय ८ जना महिला कैदीबन्दीहरू रहेको क्षेत्रीय प्रहरी कार्यालय सुर्खेतका डीआइजी माधव नेपालले जानकारी दिए । उनका अनुसार ती कारागारहरूमा ६४ जना पुरुष र ४ जना महिला गरी ६८ जना विदेशी नागरिक रहेका छन् । मध्यपश्चिम क्षेत्रका सबै कारागारको क्षमता अभिबृद्धि तथा नेपाल प्रहरीलाई श्रोत साधनले सम्पन्न गराउनुपर्ने आवश्यकता रहेको डीआईजी नेपालले बताए ।

मध्यपश्चिमाञ्चल क्षेत्रको मुगु जिल्लामा कारागार नभएको मध्यपश्चिमाञ्चल क्षेत्रीय प्रहरी कार्यालयले जनाएको छ

दुर्गा थापा