मतपेटिका बोकेको टोलीमाथि बम प्रहार

  ०७४ मङ्सिर ११ गते

मङ्सिर १० गते सम्पन्न भएको प्रतिनिधि सभा तथा प्रदेश सभा निर्वाचनको मतपेटिका बोकेर सदरमुकाम फर्कँदै गरेको टोलीमाथि लक्षित गरी मङ्सिर १० गते राति चौरजहारी नपा-६ घर्तीकाँडामा बम प्रहार भएको छ ।

सो टोलीले चौरजहारी नगरपालिकाको वडा नम्बर ६, १०, ११, १२, १३ र १४ का मतपेटिका बोकेको थियो । बम बाटोभन्दा केही माथि परेकोले मतपेटिका र टोलीमाथि कुनै क्षति नपुर्‍याएको प्रहरीले जनाएको छ ।

बम प्रहारपछि असुरक्षित महसुस गर्दै मतपेटिकालाई राति सदरमुकाम नल्याई इलाका प्रहरी कार्यालय चौरजहारीमा राखिएको छ । मङ्सिर ११ गते ती मतपेटिकालाई सदरमुकाम ल्याउने तयारी भइरहेको छ ।

मङ्सिर १० गते रातिसम्ममा पश्चिम रूकुमको मुसिकोट नगरपालिका, बाँफिकोट गाउँपालिका, त्रिवेणी गाउँपालिका र सानीभेरी गाउँपालिकाको ९ वडाका मतपेटिका सदरमुकाम पुर्‍याइसकिएको मुख्य निर्वाचन अधिकृतको कार्यालय रूकुम (पश्चिम) का सहायक निर्वाचन अधिकृत तेजप्रसाद पौडेलले जानकारी दिए ।

सानीभेरी गाउँपालिकाको बाँकी २ वडा, आठविसकोट नगरपालिका र चौरजहारी नगरपालिका अन्तर्गतका मतपेटिका मङ्सिर ११ गते बेलुकासम्म सदरमुकाम आईपुग्ने उनले बताए । मङ्सिर २१ गतेपछि नै मतगणना हुने भएकोले जिल्लाभरका मतपेटिकाहरू मुसिकोटस्थित जिल्ला समन्वय समितिको कार्यालयमा राखिने भएको छ ।

त्यस्तै पूर्वी रूकुमको पनि सदरमुकाम आसपासका केही मतदान केन्द्रको मतपेटिका मङ्सिर १० गते बेलुका नै पुगेको र टाढाका मतपेटिका मङ्सिर ११ गते हेलिकप्टरमार्फत ल्याईने मुख्य निर्वाचन अधिकृत दुर्गा भुषालले जानकारी दिए । सिस्ने, रन्मा, मैकोट, अर्जल, पेल्मा लगायतका केन्द्रमा हेलिकप्टर पठाउन अनुरोध गरिएको उनले बताए । यदि हेलिकप्टर नआएको खण्डमा सबै मतपेटिका आउन दुई दिन लाग्ने उनको भनाई छ ।


मनिषा केसी