समाचारहरू

निर्मलाको ‘भेजाइनल स्वाब’मा भएको डिएनए वास्तविक भए नभएको पुष्टि गर्न रगत नमूना दिएको आरोपमा निर्मलाका वुवा यज्ञराज पन्तले पुस २५ गते निर्मलाकी आमा दुर्गादेवी पन्तलाई हातपात तथा दुर्व्यवहार गरेका छन ।

डिएनए परीक्षणका लागि रगतको नमुना संकलन गरिएको विषयमा असन्तुष्टि जनाउँदै पति यज्ञराज र सौता लक्ष्मीले आफूमाथि दुर्व्यवहार गरेको दुर्गादेवी पन्तले बताइन् ।

‘निर्मलाको स्वाबमा भएको डिएनए सही हो कि होइन भनेर जाँच्नुपर्ने माग हामीले नै गरेका थियौँ ।’–उनले भनिन्–‘बुवा र मेरा रगतको नमूना लिने कुरा थियो । म तीन–चार दिन जिल्ला प्रशासन कार्यालय गएँ तर बुवा नगएपछि हिजो बाध्य भएर एक्लै रगतको नमुना सङ्कलन गरेँ ।’

रगतको नमूना सङ्कलन गराएपछि आफूलाई पतिले हातपात गरेको दुर्गादेवीले बताइन् । बिहान खाना पकाउँदै गर्दा पतिले आफ्नो घाँटी अठ्याउँदै कुटपिट गरेको दुर्गादेवीले बताइन् ।

छोरीको हत्या भएको ६ महिना बितिसक्दा पनि न्याय नपाइएको बताउँदै आफूले राहत रकम बुझ्ने निर्णयसमेत गरेको उनले बताइन् । आमाले राहत रकम बुझ्ने निर्णय गरे पनि निर्मलाका बुवाले भने असन्तुष्टि जनाएका छन् ।

उनले राहतको रकम बुझेर सरकारलाई अनुसन्धानका लागि सहयोग गर्ने बताइन् । आफूले राहत रकम बुझ्न खोज्दा पति र सौताले आफूमाथि दुर्व्यवहार गरेको दुर्गादेवीले गुनासो गरिन् ।

कोमलनिरनजन भाट