भाउजु हत्याका आरोपित हतियारसहित गिरफ्तार

  ०७३ चैत १८ गते

घोराही उमनपा-१७ की २८ वर्षीया पूर्णा थापालाई गोली हानी हत्या गरेको आरोपमा प्रहरीले २९ वर्षीय देवर विक्रम थापालाई चैत १८ गते हतियारसहित गिरफ्तार गरेको छ ।

जिल्ला प्रहरी कार्यालय घोराहीबाट खटिएको विशेष टोलीले लुकीछिपी बसेको अवस्थामा ओखराबाट एकथान स्वचालित पेस्तोल र त्यसको चार खोका गोलीसहित गिरफ्तार गरिएको जिल्ला प्रहरी कार्यालयमा डिएसपी भुवनेश्वर तिवारीले जानकारी दिए ।

थापाले घरायसी विवादमा गत मङ्सिर १९ गते पूर्णाकै घरमा गएर छातिमा एक राउण्ड गोली हानेर फरार भएको आरोप छ ।

घाइते पूर्णाको उपचारको क्रममा राप्ती उपक्षेत्रीय अस्पतालमा मृत्यु भएको थियो । यसअघि प्रहरीले घटनामा प्रयोग गरिएको रा २ प १२७८ नम्वरको मोटरसाइकल र विक्रमका सहयोगी घोराही उमनपा-१८ का २५ वर्षीय दिपक गिरीलाई गिरफ्तार गरी कर्तव्य ज्यानसम्बन्धी मुद्दा चलाइसकेको छ ।


जे.एन.सागर