भङ्गहा नगरपालिकाका लेखापालमाथि मेयरले कुटपिट गरेको आरोप

  ०७५ असोज ११ गते

भङ्गहा नगरपालिकाका लेखापाल पवन अधिकारीलाई सोही नगरपालिकाका मेयर २९ वर्षीय सञ्जिव साहले असोज ११ गते कुटपिट गरेको पीडित पक्षले आरोप लगाएको छ ।

कार्यालयमा हर हिसावका विषयमा सामान्य विवाद भएपछि मेयर साहले आफूलाई थप्पड हानेको पीडित लेखापाल अधिकारीले बताए ।

उनले भने–‘ममाथि मेयरले हातपात र दुर्व्यवहार गरे । यसबारेमा मैले महोत्तरीका प्रमुख जिल्ला अधिकारीलाई मौखिक जानकारी पनि गराइसकेको छु । अब मेयर साहमाथि कारबाहीका लागि प्रशासनमा लिखित निवेदन दिन्छु ।’

मेयर साहले लेखापाल अधिकारीसँग गत आर्थिक वर्ष २०७४/०७५ को हिसाव माग्दा उल्टै धम्काएपछि एक थप्पड हानेको स्वीकार गरेका छन् ।

उनले पटकपटक हिसाब माग्दा नदिएपछि गत साउन ११ गते आफूले निवेदन समेत दिएको तर, कुनै वास्ता नगरेको बताए । उनले हिसाब बारे कुरा गर्दा ‘तपाइँलाई जे गर्नुछ गर्नुस्’ भनेपछि आवेशमा आएर एक थप्पड हानेको बताए ।

मेयर साहले लेखापाल अधिकारीको काम कारवाही ठीक नभएको र मेयरलगायत प्रमुख प्रशासकीय अधिकृत कसैलाई नटेर्ने गरेको आरोप लगाए । मेयर साहले यसअघि पनि एक जना कर्मचारीलाई कुटपिट गरेको आरोप लागेको थियो ।


अजयकुमार साह