बैतडीमा २२ हजार मेट्रिक टन खाद्यान्न अभाव

  ०७३ कात्तिक १४ गते

खाद्य असुरक्षित जिल्ला मध्येको एक बैतडीमा २२ हजार ४ सय २० मेट्रिक टन खाद्यान्न अभाव हुने जिल्ला कृषि विकास कार्यालयले जनाएको छ ।

जिल्लाको जनसङ्ख्या अनुसार ५० हजार ६ सय ७५ मेट्रिक टन खाद्यान्न आवश्यक भएपनि अहिले जिल्लामा २८ हजार २ सय ५४ मेट्रिक टन मात्रै खाद्यान्न उत्पादन हुने गरेको छ ।

कार्यालयका अनुसार अहिले बैतडीका १४ ओटा गाविस उच्च खाद्य असुरक्षित छन् । ३६ औँ विश्व खाद्य दिवसको अवसरमा आयोजना गरीएको कार्यक्रममा जिल्ला कृषि विकास कार्यालयले उक्त तथ्याङ्क सार्वजनिक गरेको हो ।

विभिन्न १७ ओटा सूचकका आधारमा गाविसको खाद्य सुरक्षाको अवस्था विश्लेषण गरिएको जिल्ला कृषि विकास कार्यालय बैतडीका वरिष्ठ कृषि विकास अधिकृत कमलेश तिवारीले बताए ।

उनका अनुसार खाद्य उपलब्धता, खाद्यमा पहुँच, खाद्यको उपभोग तथा निरन्तरतामा आधारित रहेर खाद्य सुरक्षाको अवस्था पत्ता लगाइन्छ । सूचकहरूलाई विश्लेषण गर्दा जिल्लाका आम्चोरा, विशालपुर, कुलाउ, महाकाली, पञ्चेश्वर, शर्माली, शिवनाथ, उदयदेव, कोटपेटरा, थालाकाँडा, सिगास, शिवलिङ्ग, न्वादेउ र ढुङ्गाड उच्च खाद्य असुरक्षित गाविसको सूचीमा रहेका छन् ।

त्यसैगरी अन्य २३ ओटा गाविस मध्यम खाद्य असुरक्षित अवस्थामा तथा दुई ओटा नगरपालिका र बाँकी २१ ओटा गाविस न्युनतम खाद्य असुरक्षित गाविसको सूचीमा रहेका छन् ।

जिल्लामा कुल खेतीयोग्य जमीन ३१ हजार ४ सय ८५ हेक्टरमध्ये २५ हजार ७ सय हेक्टरमा मात्रै खेती गरिँदै आएको छ । तीमध्ये १० हजार ५ सय २० हेक्टरमा सिञ्चाई सुविधा पुगेको जिल्ला कृषि विकास कार्यालयको तथ्याङ्कले देखाएको छ ।


नरी बडु