बैतडीका एक सय भन्दा बढी बालबालिकामा कुपोषण

  ०७३ कात्तिक १५ गते

बैतडीका ३ हजार ३ सय १५ जना बालबालिकामध्ये १ सय १४ जना बालबालिका कडा कुपोषण देखिएको छ ।

६ महिनादेखि ५ वर्षसम्मका बालबालिकाहरूमा गरिएको सर्भेक्षण अनुसार उनीहरूमा कडा शीघ्र कुपोषण देखिएको कडा शीघ्र कुपोषणको एकीकृत व्यवस्थापन कार्यक्रम (आइमाम)का जिल्ला संयोजक प्रदिप पराजुलीले जानकारी दिए ।

पोषणको स्थिति जाँच गरिएका बालबालिकामध्ये १ सय ४८ जनामा कडा खालको कुपोषण देखिएको छ भने ३ सय ९४ जनामा मध्यम शीघ्र कुपोषण देखिएको पराजुलीको भनाइ छ ।

कडा खालको कुपोषण देखिएका बालबालिकाहरूमध्ये ७९ जनालाई बहिरङ्ग उपचार केन्द्रमा भर्ना गरिएको र उनीहरूको उपचार भइरहेको बताइएको छ । जिल्लाका विभिन्न नौ ठाउँमा सञ्चालनमा आएका ओटीसीहरूमा कडा कुपोषण भएका बालबालिकाहरूको निशुल्क उपचार गर्ने गरिएको कडा शीघ्र कुपोषणको एकीकृत व्यवस्थापन कार्यक्रमका तथ्याङ्क अधिकृत सुष्मा राईले बताए ।

प्रत्येक गाविसमा महिला स्वास्थ्य स्वयम्सेविका, स्वास्थ्यकर्मी र आइमाम कार्यक्रमका कर्मचारीहरूमार्फत बालबालिकाहरूको पोषणको स्थितिका बारेमा पत्ता लगाउने कार्य जारी रहेको उनको भनाइ छ ।

कडा खालको कुपोषण देखिएका बालबालिकाहरूको ओटिसीमा निशुल्क उपचार हुने गरेको छ भने मध्यमखालको कुपोषण देखिएका बालबालिकाका अभिभावकहरूलाई परामर्श दिने गरिएको छ ।

अहिले जिल्लाको गोकुलेश्वर, हाट, जोशीबुङ्गा, श्रीकोट, मेलौली, थालाकाँडा, पाटन, सिद्धेश्वर र जिल्ला अस्पतालमा ओटीसी स्थापना गरी कडा कुपोषण भएका बालबालिकाहरूको उपचार गर्ने कार्य भइरहेको जिल्ला जनस्वास्थ्य कार्यालय बैतडीका प्रमुख डक्टर गुणराज अवस्थीले बताए ।


नरी बडु