समाचारहरू

सशस्त्र द्वन्द्वको क्रममा राज्य र तत्कालिन विद्रोही पक्षबाट बलर्पुवक बेपत्ता पारिएका व्यक्तिहरूको घटनाको सम्बन्धमा बेपत्ता पारिएका व्यक्तिको छानविन आयोगले मङ्सिर २ गतेदेखि अनुसन्धान सुरू गरेको छ ।

आयोगले बर्दिया जिल्लाको चार स्थानका कार्यालय स्थापना गरी अनुसन्धान सुरू गरेको सो आयोगका सदस्य बिजुल बिक दुलालले बताए ।

बाँसगढी नपाको बाँसगढीमा मङ्सिर २ गते कार्यालय स्थापना गरेर अनुसन्धान अगाडि बढाएको र पहिलो दिनमै पाँच जना पीडितका परिवारसँग भेटघाट गरी काम सकिएको बाँसगढीमा स्थापना गरिएको कार्यालयका प्रमुख विष्णुप्रसाद आचार्यले बताए ।

बेपत्ता आयोगले दिएको जानकारी अनुसार ठाकुरबाबा नपाको भुरी गाउँ र राजापुर नपाको राजापुरमा मङ्सिर ३ गते साथै गुलरिया नपाको गुलरियामा मङ्सिर ४ गते कार्यालय स्थापना गरी कार्य सरू उजुरीको अनुसन्धान गरिनेछ ।

बर्दिया जिल्लाबाट सशस्त्र द्वन्द्वको क्रममा राज्य र तत्कालिन विद्रोही पक्षबाट बलपुर्वक बेपत्ता पारिएका व्यक्तिहरूका परिवारबाट आयोगमा २ सय ८८ ओटा उजुरी परेको थियो ।

आयोगले २ सय ५५ ओटा उजुरीमाथि पीडित परिवारसँग प्रत्यक्ष भेटघाट गरी अनुसन्धान अगाडि बढाएको छ । दर्ता भएकामध्ये २४ ओटा सत्य निरूपण तथा मेलमिलाप आयोगको अनुसन्धान कार्यक्षेत्र भित्र परेको भन्दै उतै पठाएको थियो । तर, सत्य आयोगले ती मध्ये आठ ओटा पुनः बेपत्ता आयोगमा पठाएको छ । नौ ओटा उजुरी भने पीडित दोहोरिएकाले हटाइएको छ ।

सशस्त्र द्वन्द्वको क्रममा राज्य र तत्कालिन विद्रोही पक्षबाट बर्दिया जिल्लामा सबैभन्दा बढी बलर्पुवक बेपत्ता पारिएका व्यक्तिहरूको सङ्ख्या रहेको छ ।

स्थानीय शान्ति समिति बर्दियाको तथ्याङ्क अनुसार बर्दिया जिल्लामा सशस्त्र द्वन्द्वको समयमा राज्य र तत्कालिन विद्रोही पक्षबाट २ सय ६९ जना बेपत्ता पारिएका थिए ।

मानबहादुर चौधरी