समाचारहरू

२१ वर्षदेखि २६ वर्षउमेरका तीन जना महिलालाई प्रलोभनमा पारेर भारत हुँदै तेस्रो देशमा पठाउन लागेको आरोपमा झापा गरामुनी-७ का राजकिशोर बजगार्इंलाई प्रहरीले मङ्सिर १९ गते हेटौडाबाट गिरफ्तार गरेको छ ।

हेटौडा उमनपा-१० स्थित बसपार्कबाट तीन जना महिलालाई उद्धार गर्नुको साथै आरोपित बजगाईंलाई गिरफ्तार गरिएको प्रहरीले जनाएको छ ।

तीनै जना युवतीको राहदानी पनि बजगाईंले नै काठमाडौँबाट बनाइदिएको आरोप लगाएको छ । भारत हुँदै एक युवतीलाई दुवई र दुई जना युवतीलाई कुवेत पठाउने भनेर फकाएर ल्याएकाले आरोपितलाई गिरफ्तार गरेको प्रहरीले जनाएको छ ।

भारतको दिल्लीबाट तीनै जनालाई रोजगारीको निम्ति कुवेत र दुवई पठाउने भनेर ल्याएको प्रहरीसमक्ष पीडित महिलाले बयान दिएका छन् ।

प्रहरीले उद्धार गरिएका तीनै जनालाई उनीहरूको परिवारको जिम्मा लगाउन बोलाएको जनाएको छ ।

प्रताप विष्ट