बेचबिखन घटनाका आरोपितविरुद्ध प्रहरीमा उजुरी

  ०७६ जेठ १३ गते

१७ वर्षीया बालिकालाई प्रेमजालमा फसाएर विवाह गरी भारतको कोठीमा लगेर बेचेको आरोपमा लोहरपट्टी नपा–२ का २१ वर्षीय मोहम्मद रबानी कवारीविरुद्ध पीडितले जेठ ११ गते जिल्ला प्रहरी कार्यालयमा उजुरी दिएकी छिन् ।

पीडित बालिकासँग चार महिनाअघि आरोपित कवारीले प्रेमविवाह गरेर भारत लगेका थिए । ती युवती भारत विहार प्रान्तको मुज्जफरपुरस्थित कोठीमा बेचिएकी थिइन् । उनी त्यहाँबाट भागेर नेपाल फर्किएपछि घटना बाहिर आएको हो ।

बिरामी अवस्थामा नेपाल फर्किएकी युवतीको जनकपुर अञ्चल अस्पतालमा उपचार भएको थियो । उनी एक साता उपचार गराएर घर फर्किएकी छन् ।

‘पहिला प्रेम जालमा फसाए । त्यसपछि विवाहको नाटक गरी मलाई छलेर भारत विहारको मुजफरपुरस्थित एक कोठीमा पु¥याए । मलाई त्यहाँ पुर्‍याएर यौन कार्यमा लगाए । मैले अस्वीकार गर्दा हातखुट्टा बाँधेर नसाको सुई लगादिन्थे, चिच्याउँदा कुट्थे । मुखमा कपडा कोचिदिन्थ्यो र यौन धन्दामा लगाउँथे ।’–पीडितले भनिन् ।

चरम यातना र यौन शोषणमा परेर सिकिस्त भएकी ती युवती जेठ ४ गते साँझ जनकपुरको रामानन्दचोकमा आइपुगेकी थिइन् ।

घटनाबारे अनुसन्धान भइरहेको जिल्ला प्रहरी कार्यालयका एसपी शेखर खनालले बताए । प्रहरीमा उजुरी दर्ता गराएपछि पीडित बालिकाको स्वास्थ्य परीक्षण जनकपुर अञ्चल अस्पतालमा गरिएको छ ।


अजयकुमार साह