समाचारहरू

लोहारपट्टी नपा–३ की २० वर्षीया विनादेवी सहनीलाई हत्या गरेको कसुरमा जिल्ला अदालतबाट २० वर्ष कैद सजाय सुनाइएपछि फरार रहेका ५२ वर्षीय ससुरा शङ्कर सहनीलाई प्रहरीले महदैयाबाठ फागुन ६ गते गिरफ्तार गरेको छ ।

जिल्ला प्रहरी कार्यालय महोत्तरीका डिएसपी प्रकाश बिष्टका अनुसार गिरफ्तार गरिएका सहनीलाई फागुन ६ गते नै अदालतमा पेस गरिएकोमा अदालतले कोरोना भाइरस चेकजाँच गरी ल्याउन भनिएपछि हाल जिल्ला प्रहरी कार्यालय महोत्तरीको हिरासतमा राखिएको छ ।

शङ्करले बुहारी विनादेवीलाई घरायसी विवादका कारण विष खुवाई घाँटी थिचेर हत्या गरेको कसुरमा अदालतले यस्तो फैसला सुनाएको थियो ।

प्रहरीका अनुसार २०६४ भदौ १३ गते ससुरा शङ्कर सहनी, सासू चन्दरदेवी सहनी, देवर राजकुमार सहनी, छिमेकी बली साह र शङ्कर साह मिलेर विनाको हत्या गरेको आरोप थियो ।

आरोपितमध्ये ससुरा शङ्कर सहनी, सासू चन्दर देवी र छिमेकी शङ्कर साहलाई २० वर्ष कैद र मृतकका देवर राजकुमारलाई १५ वर्ष कैद तथा ३० रुपियाँ जरिबाना तोकिएको छ ।

यसमध्ये छिमेकी बलीको मृत्यु भइसकेको र शङ्कर साहलाई गत माघ १८ गते गिरफ्तार गरिसकिएको प्रहरीले जनाएको छ ।

यो घट्नामा अदालतबाट कैद सुनाइएकामध्ये दुई जनालाई प्रहरीले गिरफ्तार गरेपनि अन्य भने अहिलेसम्म गिरफ्तार भएका छैनन् ।

अजयकुमार साह