बुहारीलाई बेपत्ता बनाएको आरोपमा प्रहरीविरुद्ध उजुरी

  ०७३ असोज ८ गते

इनरुवा फुलबडिया गाविस–९ की २० वर्षीया सिमरन मण्डललाई प्रहरीले नै बेपत्ता बनाएको भनी उनका ससुरा जियाउल हकले राष्ट्रिय मानव अधिकार आयोग जनकपुरमा निवेदन दिनुका साथै उच्च अदालतको राजविराज इजलासमा असोज ७ गते बन्दी प्रत्यक्षीकरणको रिट निवेदन दिएका छन् ।

हकले इलाका प्रहरी कार्यालय कल्याणपुरका इन्स्पेक्टर सुर्यनारायण यादव, सई जयप्रकाश साह, प्रहरी हवल्दारहरू दिपेन्द्र यादव र जितु पासवानसहितको प्रहरी टोलीले अदालतको नाताकायमलाई बेवास्ता गर्दै २१ वर्षीय छोरा एर्शाद हुसेनबाट अलग गराई बुहारी सिमरनलाई भदौ ३१ गते जबरजस्ती घरबाट लगेर बेपत्ता बनाएको आरोप लगाएका छन् ।

हकले दिएको उजुरी निवेदनमा बुहारी सिमरनलाई सकुशल फिर्ता गर्नुका साथै प्रहरीले डरत्रास र धम्की दिएर लिएको २ लाख ५ हजार रुपियाँ फिर्ता पाउन माग गरिएको छ ।

भदौ १ गते इनरुवा फुलबडिया गाविस–९ स्थित घर आइपुगेपछि एर्शादका परिवारका सदस्यहरूले उचित निकासका लागि सिमरनलाई इलाका प्रहरी कार्यालय कल्याणपुर पुर्‍याएका थिए । प्रहरीले दुवैलाई विना पुर्जी ६ दिनसम्म थुनामा राखेर ‘अपहरण तथा बलात्कार मुद्दामा ११ वर्ष कैद’ को धम्की दिएपछि एर्शादका बुवा हकले प्रहरीले भने बमोजिम भदौ ६ गते २ लाख २० हजार रुपियाँ दिएर एर्शादलाई छुटाएर घर लगेको र सिमरनलाई उनका काका शोभित मण्डलको जिम्मा लगाइएको एर्शादका काका अताउल हकले बताए ।

धेरै प्रयास गर्दा पनि विवाह सम्भव नभएपछि एर्शाद र सिमरनले सप्तरी जिल्ला अदालतबाट भदौ २७ गते नाताकायम गराई घरमा बस्दै आएका थिए ।

इन्स्पेक्टर यादवले भने घरबाट बेपत्ता भएकी नाबालिका सिमरनलाई खोजतलास गरी जिम्मा लगाउन इलाका प्रहरी कार्यालय लहानले पठाएको पत्र अनुसार भदौ ३१ गते जिम्मा लगाएको बताए ।

जिल्ला प्रहरी कार्यालयमा पीडित पक्षले दिएको उजुरीमा भने एसपी भिमप्रसाद ढकालले इन्सपेक्टर यादव र सई साहसँग असोज ७ गते दोस्रो पटक स्पष्टिकरण सोध्नुका साथै छानबिन समिति नै गठन गरी कारबाही प्रकृया अगाडि बढाइएको जानकारी दिए । यसैगरी रकम लेनदेनमा संलग्न सिरहा पतारका विष्णु यादवलाई असोज ७ गते गिरफ्तार गरी थप अनुसन्धान भइरहेको एसपी ढकालले बताए ।


मनोहर कुमार पोखरेल