समाचारहरू

जिल्ला अदालत दैलेखले बालविवाह कसूरमा आठबीस नगरपालिका–६ सिंगासैनका २१ वर्षीय नरेन्द्र थापालाई ६ महिना कैद र ५ हजार जरिवाना सजाय गरेको छ ।

जिल्ला न्यायाधीश दण्डपाणी लामिछानेको इजलासबाट ०७७ फागुन ५ गते भएको फैसलामा नरेन्द्र थापासँग बालविवाह गर्ने १६ वर्षीया बालिकालाई पनि ३ हजार तीन सय तेत्तीस रूपैयाँ तेत्तीस पैंसा जरिवाना तोकिएको अदालतका सूचना अधिकारी टीकाराम न्यौपानेले जानकारी दिनुभयो ।

नरेन्द्र र ती बालिकाबीच ०७७ भदौ १७ गते बालविवाह भएको भन्दै प्रहरीले भदौ २७ गते सिंगासैनस्थित घरबाट गिरफ्तार गरी प्रहरीले मुद्दा चलाएको थियो ।

जिल्ला अदालतमा असोज १६ गते पेश भएको उक्त मुद्दामा थुनछेक बहसपछि आरोपित दुबैलाई तारेखमा छाडिएको थियो ।

तीन वर्ष भन्दा कम कैद तोकिएको फैसलामा चित्त नबुझे पुनरावेदन गर्न पाउने कानुनी व्यवस्था भएकोले उनीहरूलाई कारागार नपठाइएकोसूचना अधिकारी न्यौपानेले बताउनुभयो ।

अमर सुनार