बाल दिवसले छोएन माधवलाई, जान्ने सुन्ने भएदेखि नै गोठमै बाँधिएर बित्छ दैनिकी

  ०७६ भदौ ३० गते

सुनिश्चित बाल अधिकार, समृद्ध नेपालको मुल आधार भन्ने मुल नारासहित भदौ २९ गते देशभर राष्ट्रिय बाल दिवसका अवसरमा विभिन्न रचनात्मक कार्यक्रमहरू सञ्चालन भएका छन् ।

तर, देशैभर बाल दिवसमा बालबालिका र उनीहरूको उज्वल भविष्यबारे चर्चा भएपनि पूर्वखोला गाउँपालिका–१ सिलुवा ढाक्रेबासका नौ वर्षीय बालक माधव सारु भने गाईभैँसी बाँध्ने गोठमा गाईभैँसी सरह नै बाँधिएरै दैनिकी बिताउँदै आएका छन् ।

माधव बोल्न जान्दैनन्, उनी आफैँ खान पनि सक्दैनन् । त्यसै छोड्दा धेरै पटक हराएको र कता जान्छन् कता भन्ने डरले उनी हिँड्ने भएदेखि नै यसैगरी बाँधेर राख्न थालिएको उनका बाबु डिलबहादुर सारुले बताए ।

खाना खाने बेलामा पनि समाएर खुवाउनुपर्ने र राति सुत्ने बेलामा समेत खाटमा बाँधेरै सुताउनुपर्ने उनकी आमा मिना सारुले बताइन् ।

‘राति घर भित्र लगेर सुताउँछौँ । बिहान भएपछि गोठमा ल्याएर यसैगरी बाँधेरै राख्ने हो ।’–उनले भनिन् ।

माधव सारु दम्पत्तिका कान्छा छोरा हुन् । माधवका ११ वर्षीय दाजु नारायण पनि अपाङ्ग छन् । उनी पनि सुन्न र बोल्न सक्दैनन् ।

तर, दिनभरी बेवारिसे अवस्थामा गाउँ डुलेर साँझ घर फर्कन्छन् । उनीहरूकी दुई वर्षीया बहिनी पनि छन् । तर, बहिनी भने बोल्न थालिसकेकी छन् ।

गाउँपालिकामार्फत हालै सङ्कलन भएको अपाङ्गतासम्बन्धी तथ्याङ्कमा दुवै जनाले रातो कार्ड पाउने बताएको उनीहरूका बाबु डिलबहादुरले बताए ।

खेती किसानी र ज्याला मजदुरी गरी दैनिकी गुजार्दै आएका सारु परिवारले आर्थिक अभावमा छोराहरूको उपचार गराउन नसकेको बताए ।

photo20190916palpa (1)

photo20190916palpa (2)


यज्ञमूर्ति तिमिल्सिना