समाचारहरू

जनकपुरस्थित सद्गुरू कविर बाल आश्रममा अनौपचारिक क्षेत्र सेवा केन्द्र (इन्सेक) धनुषाका जिल्ला प्रतिनिधि दिपेन्द्रप्रसाद सिंहको पहलमा मङ्सिर १६ गते आर्थिक सहयोग गरिएको छ ।

आश्रमका सञ्चालक प्रोफेसर सन्त सत्यनारायण आलोकलाई इन्सेक प्रतिनिधिको पहलमा १४ हजार रुपियाँ, फलफूल र मानव अधिकारसम्बन्धी पुस्तकहरू प्रदान गरिएको हो ।

वैदेशिक रोजगारीको क्रममा कतारमा कार्यरत महोत्तरी बर्दिवास नगरपालिकाका युवा दिनेश शर्माले इन्सेक धनुषा प्रतिनिधि दिपेन्द्रप्रसाद सिंहलाई आश्रममा रहेका १३ जना बालबालिकाहरूको सरंक्षणका लागि पठाएको १४ हजार रुपियाँलगायतका सामग्री आश्रमका सञ्चालकलाई प्रदान गरिएको हो ।

धनुषाका प्रमुख जिल्ला अधिकारी प्रदिपराज कँडेल, इन्सेक प्रदेश २ का संयोजक राजु पासवान, समाजसेवी बैद्यनाथ साह, इन्सेक महोत्तरी जिल्ला प्रतिनिधि अजयकुमार साह, रेडियो नेपाल प्रदेश २ का प्रमुख संवाददाता अजय झालगायतकोे  उपस्थितिमा आर्थिक सहयोग गरिएको हो ।

सहयोग कार्यक्रममा धनुषाका प्रमुख जिल्ला अधिकारी प्रदिपराज कँडेलले वैदेशिक रोजगारीको क्रममा कतारमा रहेका शर्माले पठाएको १४ हजार रुपियाँले आश्रमलाई ठुलो साथ र सहयोग भएको भन्दै आफ्नो कडा मेहनत र परिश्रम गरी आश्रमलाई सहयोग गर्नुहुने सहयोगदाता शर्मा र समन्वयकर्ता इन्सेक धनुषा प्रतिनिधिलाई धन्यवाद दिनुभयो ।

आश्रमका सञ्चालक प्रोफेसर सन्त सत्यनारायण आलोकले धनले कमजोर भएपनि समाजिक मनले धनी  दिनेश शर्माले खाडी मुलुकबाट आश्रमलाई सहयोग गर्नु भएकोमा हार्दिक धन्यवाद ज्ञापन गर्नुभयो । आश्रममा अहिले १३ जना बालबालिकाहरू रहेका छन् ।

दिपेन्द्रप्रसाद सिंह